TAAS-TAAS gyud nga bakasyon sa mga empleyado sa mga pribadong mga opisina ug mga buhatansa atong gobyerno tungod sa kasaulogan sa Semana Santa. Nganong Semana sa Santa? Tungod kay sulod sa usa ka semana ang mga plano sa mga Judio aron ilang taralon si Ginoong Jesukristo nga nagpatuong anak siya sa Diyos.
Dili basta-basta ang gidangatan ni Ginoong Jesukristo sa dinhi pa Siya sa yuta, bisan pa man kon nahibawo na ang iyang mga kaliwatang mga Judio nga gipanganak siya kang Maria, ug dili anak sa bana niining si Joseph ug siya lalang sa Espirito Santo, ug pinadala sa Diyos dinhi sa kalibutan apan wala gihapon Siya tuhoi.
Si Jesukristo mao ang katumanan sa usa ka pinulongan nga
"To see is to believe", tungod kay ang Diyos dili man gayud makita sa personal. Gikan pa kang Adan ug Eva, ngadto kang Abraham ug ngadto kang Moises mabati mo lang ang tingog gikan sa nagdilaab nga kalayo, apan wala kay dagway nga makita.
Si haring Paraon nga hugot nga nagtuo sa iyang rebultong diyos-diyos nga kinulit sa bato ug gihalad ang patay'ng lawas anak ug nag-ampo nga mabuhi apan pakyas si Haring Paraon kay walay tubag ang iyang diyos-diyos nga gikulit gikan sa dakong bato.
Apan ang buhing Diyos ni Moises bisa'g dili tuod makita, apan motubag sa tanang niyang pagsangpit ug pag-ampo. Aron motuo gyud ang mga katawhan nga adunay Diyos, gipakatawo si Jesukristo kay gitagna na Siya ni propeta ISAIAS 9: 6, "Kay natawo ang usa ka batang lalaki ug siya magmando sa tanan, walay katapusang amahan maalamong magtatambag, DIYOS NGA GAMHAMAN Prinsipe sa paigdait". COLOSAS 2: 15, Si Jesukristo ang dagway sa dili makita nga DIYOS, apan mismo kaliwatan ni Jesuskristo wala moila kaniya.
Ang Katoliko mao ang dominanteng relihiyon sa Pilipinas, kay bisa'g dili moila ang ubang mga relihiyon sa pagsaulog sa Semana Santa, pilit silang mosunod sa mga adlaw nga holiday nga gisaulog sa relihiyong Katoliko nga nagsaulog na pod sa ilang ika-500 ka tuig dinhi sa Pilipinas niadtong Marso 16, 2021.
Tanang mga relihiyon dinhi sa Pilipinas ang ilang mga FOUNDER gikan gyud sa relihiyong Katoliko, mibuwag kini kay lagi ang tanang mga salawayon ug mga dautan anaa sa relihiyong KATOLIKO, di ba?
Pero mas maayong dili na lang ta maghukom nila kay sa JEREMIAS 5: 26, imong mabasa nga nagkanayon, "Daghang mga dautan sa akong mga katawhan, sama sila sa mga malilit-ag og langgam, apan ang buot nilang lit-agon mao ang mga tawo."
Daghan ko'g naobserbahan nga mag-abot na gani ang mga nagkadaiyang relihiyon magpunay'g debati nga sila maoy husto, kay ang karatula sa ilang simbahan mabasa gyud sa Bibliya.
Apan usa lang ang akong gituhoan nga walay relihiyon nga atong basihan aron maluwas kita, kana ang atong maayong binuhatan. Atong basahon ang ikaduhang CORINTO 5: 10, "KAY KINAHANGLAN MOATUBANG KITANG TANAN KANG JESUKRISTO ARON IYANG HUKMAN ARON ANG TAGSA-TAGSA MAKADAWAT SA ANGAY KANIYA, SUMALA SA IYANG NABUHAT NING KALIBUTAN, MAAYO MAN O DAUTAN".
Sa ato pa, mga MAKILILIMOS, PASTOR, MINISTRO, FOUNDER SA BISA'G UNSANG RELIHIYON, PARI, OBISPO SANTO PAPA mga igsuon pareho ra ta og bili sa atubangan ni KRISTO. Busa dili ta magpagarbo nga luwas ta. Ug unsay pangalan sa atong relihiyon, pagbinut-an kay mao nay imong kapital nga mahilangit ka. AMEN?