TANGGONG karon ang unom ka magsilingan human sila nasikop sa awtoridad dihang perteng tagay og tuba niadtong Biyernes Santo.
Naundang ang tagay-tagay sa unom pag-abot sa kapulisan sa Baguio Police Station, diin nasuta nga ang mga nahisgutan nakalapas sa liquor ban ug social distancing.
Ang unom nga malapason nadakpan sa Purok Durian, Barangay Wines, Baguio District, Davao City pasado alas 5 sa hapon, Abril 2.
Nasikop ang unom sud sa balay sa usa ka alyas Naldo kinsa gisikop sab sa kapulisan kay midimdim sab og tuba.
Mga dinakpan mao sila alyas Martin, 61; Marjohn, 24; Roy, 18; Nilo, 29; ug si Bryan, 33.
Nakuha gikan kanila ang usa ka galon sa tuba diin ang mga dinakpan anaa sa kustodiya sa Baguio Police Station. (Jeepy P. Compio)