NATIGAYON alas 9:30 sa buntag, Dominggo, Abril 4, 2021, ang pagpang-apud apod og cash ug food assistance alang sa Bankerohan fire victims.
Mismong ang buhatan ni Davao City First District Representative Paolo "Pulong" Duterte ang miapud-apod nga gipahigayon sa balay ni Barangay 5-A Kapitan Edgar Ibuyan sa Everly Homes, Don Isidro Village, Bankerohan.
Subay sa talaan sa City Social Welfare and Development Office (CSWDO), dunay house owners nga 26; house sharers 15; house renters 23 ug dunay 20 ka mga boarders nga maoy naglangkob sa 21 ka mga totally damaged ug lima ka partially damaged.
Moayuda sab og pinansiyal ang lokal nga panggamhanan ning siyudad pinaagi sa CSWDO alang ngadto sa mga pamilya nga nasunogan.
Una nang giayudahan ang mga nahisgutan og mga gamit sa panimalay ug dunay gihimong community cooking pinaagi sa Barangay 5-A.
Kahinumdoman, April 1 sa gabii, Huwebes Santo, miulbo ang kalayo sa kabalayan sa Purok 4 ug Purok 5, sa Pag-asa Bankerohan.
Sa inisyal nga imbestigasyon sa Bangoy Sr. Fire Station, nasuta nga electrical faulty wiring ang rason sa kalayo.
Alas 12:30 sa tungang gabii Abril 2, gideklara nga fire-out ang sunog.
Hinuon, walay natalang casualties o naangol atol sa insidente diin padayong gisubay sa kabomberohan ang kinatibuk-ang damyos sa maong hitabo. (Jeepy P. Compio)