NAGBANGOTAN karon ang pamilya sa usa ka 30-anyos nga lalaki nga nahagbong sa pangpang samtang nagmaneho sa iyang motorsiklo niadtong Semana Santa.
Nahitabo ang insidente sa Barangay Eman, Bansalan, Davao del Sur alas 3:15 sa kaadlawon, Miyerkules Santo, Marso 31, 2021, sigun sa taho sa traffic section sa Bansalan Municipal Police Station (MPS).
Sa imbestigasyon, giila ni Major Peter Glenn Ipong, hepe sa Bansalan MPS ang biktima nga si Clifford Dano Sisneros, ulitawo, molupyo sa Barangay Managa ning lungsod.
Gihulagway nga nagmaneho ang biktima sa iyang Suzuki Raider nga motorsiklo samtang pauli na sa ilang lugar apan kalit nga misirko sa shouldering nga parte sa barangay road ug milahos kahagbong sa 5-metros nga gilawmon sa pangpang.
Miresulta ang insidente sa pagkahiagom niini og mga pangos ug bun-og sa nagkadaiyang parte sa kalawasan.
Matud ni Ipong nga nadala pa ang biktima ngadto sa Mabama Medical Hospital, apan banda alas 4:45 sa kaadlawon, gideklara ni Dr. Leo Fernando Baz nga nakabsan na kini sa kinabuhi.
Gihaya na ang patay nga lawas sa biktima sa ilang panimalay.