Hapit modoble ang gidaghanon sa mga traffic violation ang natala sa Cebu City Transportation Office (CCTO) sa Marso 2021 kon itandi niadtong Pebrero.
Sa Marso, nakaisyu ang CCTO og 21, 3340 ka traffic citation tickets (TCT) sa nakalapas nga mga drayber, hapit modoble sa Pebrero nga duna lay 11, 264.
Sagad sa mga kalapasan naglakip sa paghunong sa dapit nga dunay no stopping sign, way registration ang sakyanan, way lisensya ang drayber ug uban pa.
Sa overnight parking sa mga sakyanan sa kadalanan sa Dakbayan sa Sugbo, ang CCTO naka clamp og 840.
Kada tungang gabii hangtod na sa buntag, ang CCTO nagpatrolya sa kadalanan, labina niadtong dapit nga gipangreklamo nga dunay overnight parking.
Daghan sab sa nakalapas nag park sa bike lanes.
Ang labing daghan usab nila nga na impound nga sakyanan mao ang motorsiklo, diin 619 ang napaslak sa impounding area.
Naka impound usab sila og e-bikes (10), traysikad (11), four-wheeled nga sakyanan (25), traysikol (1), trak (10), PUJ (3), taxi (1) ug trailer (1).
Giawhag sa CCTO ang mga drayber nga ilang naisyuhan og TCT sa pagbayad gilayon sa ilang kalapasan nga nahimo aron di na kini moabot sa korte.
Kon moabot na sa korte, modako na ang ilang bayranan ug luwatan pa og arrest warrant sa hukmanan aron pagdakop kanila, busa, matod sa CCTO, mas maayong i-settle og sayo ang mga multa.
Gatusan ka mga kaso sa kalapasan sa balaud sa trapiko ang maduso sa CCTO ngadto sa Cebu City Prosecutor's Office alang sa pagpasaka sa kaso. (REV)