HUMAN sa hapit usa ka adlaw nga pagbiyahe gikan sa Davao, niabot ra kami sa Dakak Resort sa Dapitan, Misamis Occidental. Usa kini ka mahalong beach resort sa Dapitan haduol sa Dipolog City nga gipanag-iyahan sa pamilyang Jaloslos.

Haduol sab dinhi ang naila nga 456 ka ektarya nga Rizal Shrine diin na-exile si Dr. Jose Rizal sud sa upat ka tuig sugod 1894. Gidala siya balik sa Manila ug gi-firing squad sa Bagumbayan o Luneta na karon. Nindot kaayo ang Dakak nga nahimong tourist attraction niining dapita.

Nalipay kita nga nibalik na pag-abri ang turismo sa atong lugar human sa dugay nga pagkahinanok tungod sa Covid-19 pandemic. Matud pa sa mga trabahante sa naasoy nga resort nga medyo nibalik na ang kasadya sa ilang lugar sugod niadtong Enero 2021.

Bisan tuod nga 50 percent ra ang kapasidad nga gitakda sa gobyerno nalipay na kaayo sila kay naa nay trabaho sa mga trabahante ug negosyo nga niabri. Ikaduha nako kining pagbisita sa Dakak kay didto gihimo ang planning sa usa ka organisasyon sa lumad nga Subanen nga akong gitabangan nga gitawag og Lupa Pusaka Pisalabuhan Gokom Di Diplahan.

Ang una nako nga pagbisita kay niadto pang 1988 diin giubanan nako ang usa ka TV crew nga Belgians nga naghimo og istorya kabahin sa agrikultura nga gisuportahan sa ilang nasud.

Medyo gamay ug dili pa kaayo nindot ang maong resort nga makumpara nato sa ilado nga Boracay sa Aklan. Apan karon daghan nang pasilidad nga makita sama sa 18-holes championship golf course, dagko ug gagmay’ng swimming pools, mga restaurant, ug mga cottages ibabaw sa nagkawa nga bungtod nga wala pa kaniadto. Gibalik sab ang pasundayag nga Filipiniana matag gabii sa kilid sa baybayon sa resort.

Niadtong Sabado ang ilang gipasundayag kay ang "fire dance." Tulo ka batan-on ang nagpasundayag sa ilang talagsaon apan delikado nga trabaho sa pagsayaw nga may dalang kalayo ug mobuga og kalayo. Tungod kay Semana Santa man, napuno ang maong resort sa mga magduduong sa bisan asang dapit sa Mindanao.

Medyo luag na man ang mga checkpoint pasulod-gawas sa probinsiya sa Misamis Occidental gawas sa checkpoint sa Munisipyo sa Rizal nga gusto nilang magpa-swab ug magkuwarintinas ang bisan kinsa nga taga-Davao.

Maayo na lang nga may kauban kami nga taga IATF nga maoy nag-abugar sa tulo ka van nga gikan dinhi sa Davao. Maayo sab ang serbisyo sulod sa resort ug gimentinar nila ang seguridad ug kalimpyo sa lugar.

Tungod kay may Covid pandemic pa man, ila gihapong gipairal ang pagsunod sa mga reglamento sa IATF ug sa DOH. Di ka makasulod kung dili ka mopailalom sa ilang check-up ug pagsulat sa health sheet.

May na-allergic sa chlorine sa swimming pool sa among kauban ug diha-diha dayon kining giatiman sa ilang nurse bisan kung gabii na kini.

Apan sama sa ilado ug "first class" nga resort medyo mahal ang Dakak sa ordinaryong lumulupyo. Hinuon sulit ang kasinatian nimo didto ug lamian sab ang pagkaon. Kadtong nagplano og suroyan human sa Covid, sulayi ninyo ang Wow Dakak!