DIGOS CITY -- Hingpit nang giabrihan sa Diocese of Digos ang balaang pultahan (Holy Door) alang sa ika-500 ka tuig nga Kristiyanismo dungan sa paghandom sa Dominggo sa Pagkabanhaw ni Kristo niadtong Dominggo, Abril 4, 2021.
Mismong si Most Rev. Guillermo Afable, obispo sa Diocese of Digos, nangulo sa misa ug miabri sa balaang pultahan didto sa San Isidro Labrador Parish ning dakbayan, alas 9 sa buntag.
Una ang Santos nga Misa, gihimo ang prusisyon sa imahe ni Sr. Santo Niño nga mao ang simbolo sa ika-500 ka tuig nga kasumaran sa Kristiyanismo dinhi sa Pilipinas.
Gitukod sab sa Diocese of Digos ang 35 ka tiil nga gitas-on ug 16 ka tiil nga gilapdon sa Jubilee Cross nga makita didto sa St. John Paul Parish sa Brgy. Inawayan, Sta. Cruz.
Sa maong adlaw, gihimo ang pag-bendisyon sa "giant cross" sa pagpanguna ni Rev. Fr. Ruel Desamparado, RJC, dungan sa kick-off ceremony sa Kristiyanismo.
Adunay lima ka Jubilee Churches ang probinsiya ug dungan kining miabri sa ilang Jubilee Doors una gihimo ang mga misa.
Apan kini na ang ikaduhang tuig nga wa nahitabo ang tradisyonal nga sugat sa Easter Sunday, inay usa ka caravan ang gihimo sa mga simbahan aron ituyok sa mga kalungsoran ang imahe sa nabanhaw nga Kristo ug Birhen Dolorosa.
Gihimo kini aron matuman ang minimum health protocols nga gitakda sa Inter-agency Task Force aron malikayan ang pagkatap sa Covid-19. (Orlando B. Dinoy)