Summer na gyud kay ang mga balita karon sa showbiz naglagiting usab sa kainit, sama sa dihang gianunsyo nilang Luis Manzano ug Jessy Mendiola nga nakasal na sila niadto pang Pebrero.

Niadtong Dominggo de Gloria gikumpirmar usab ni JM de Guzman ug Arci Munoz sa Instagram nga sila na.

Ang duha parehong 32 anyos ug parehong kadaghan na na-in love ug na-broken hearted. Sila na kaha ang magkadayon o basin bunga ra ni sa ilang kamingaw sa nagpadayong quarantine gumikan sa kataas sa kaso karon sa Covid sa Manila? (Ay, buing prank ra diay!)

Pinakauwahing nag-positive sa Covid silang Ted Failon ug Cheryl Cosim sa TV5. Apan pareho silang asymptomatic. Samtang parehong na-cremate na ang lawas sa OPM icon nga si Claire dela Fuente ug ang 70-anyos nga inahan sa aktres nga si Jean Garcia nga puros namatay sa Covid.

Daghan sad ang nakurat dihang gianunsyo niadtong Biyernes Santo sa aktres nga si Alice Dixson nga usa na siya ka inahan sa edad nga 51 human nanganak ang gikuha nilang “surrogate mother” sa Amerika.

FOR PRESIDENT?

Init usab karon sa social media kining chika nga modagan kuno si Manny Pacquiao sa mas taas nga posisyon sa 2022 election. Kundi man gani bise basin kuno sa pagka-presidente. Hinuon wa man say lig-ong kontra.

Ang pangutana kon modaug si Pacquiao makaya ba kaha niya ang grabeng problema nga giatubang karon sa Pilipinas?

Sama aning utang nato nga nikalit lag saka sa P10.4 trillion tungod kuno sa Covid, ang isyu sa China, ang grabeng corruption, ang way kahumanang problema sa druga, kini pang pandemya ug daghan pa kaayo.

20 MILLION VIEWS

Init usab nga nihakot sa takilya ang pelikulang “Love or Money” nilang Coco Martin ug Angelica Panganiban nga duna nay 20 million views sa Facebook, Twitter, ug YouTube sukad nagsugod ang ilang streaming niadtong Marso 12.

Sagad sa mga nanan-aw mga OFW labi na kadtong mga taga-Dubai diin gi-shoot ang maong pelikula. Ang ticket gibaligya sa P250 or US$499. Padayon pa gihapong ning gi-stream sa online.

Ang powerhouse cast naglakip nilang Gelli de Belen, Ketchup Eusebio, Cai Cortez, Matet de Leon, Dante Rivero, Teresa Loyzaga ug Pinky Amador. Bisitaha ang http://solo.to/cinexpress alang sa inyong movie pass.