Naa toy panahon nga dakpon ang mamaligya ug mogamit og “Lianhua Quingwen” isip tambal alang sa mga nangasakit og Covid-19. Apan sa ngadto ngadto, nausab ang gimbut-an sa Food and Drug Administration (FDA).
Sa pagkakaron, mahimo na kining paliton sa mga botika dinhi sa Syudad sa Sugbo. Naa lang gyuy nitambag nako nga siguruon sa pag-research ang kabahin sa epekto ug mga side effects sa maong tambal.
Mas maayo sab gyud nga dunay giya sa usa ka doctor ang paggamit sa maong tambal labi na kon dunay high blood pressure ug sakit sa kasingkasing.
Bisan pa man, daghan kita og nabasahan ug nadunggan kabahin sa pagka epektibo niini.
Atong nasayran nga karaan kini nga herbal nga tambal sa China isip tambal sa influenza ug pneumonia. Dihang nibuto ang pandemya, usa kini sa tambal nga gisuwayan aron mabatokan ang mga symptomas sa Covid-19.
Karong bag-o, nitumaw kining tambal nga gitawag og Ivermectin. Usa kini ka anti-parasitic drug nga dugay na gigamit. Apan, matod pa, kulang pa og clinical trials sa paggamit niini batok sa Covid-19.
Samtang dunay mga doctor nga moingon nga epektibo ang Ivermectin, apan mao lagi kuno, kulang pa ang clinical trials.
Ang ako lang kay daghan na baya ang naggamit sa maong tambal. Di lang kini maapil sa giingong clinical trials kay tago-tago baya ang paggamit niini.
Ang pangutana karon, dili ba mag-inisyatiba ang FDA ug ang DOH og clinical trials aron kon mamatud-an gyud nga epektibo, duna kitay dugang pangkontra sa Covid-19. Kini labi na nga hinay kaayo ang atong pagpalit ug pag-rollout sa mga bakuha.
Ambot, belib man kaayo kining the best president in the solar system sa iyang health secretary ug kining hepe sa FDA.
Grabi sab ang iyang belib sa mga kanhi heneral nga maoy nagdumala karon sa atong anti-Covid response. Dayon, bisan og nagkasaka ang mga kaso, magsigi og ingon kining iyang presidential spokesman nga epektibo kaayo ang anti-Covid response sa Pilipinas.
Lalim bay sa 2021 budget, imbes ang labing dakong budget anha unta sa panglawas ug mga bakuna, unahon man hinuon ang mga infrastructure ug ang pag-kontra sa mga Kumunistang Pinoy.
Apan, dia kitay presidente nga daw mabayot kon ang iyang kaistorya mao ang presidente sa labing dakong nasud nga Kumunista sa kalibotan. DM @anol_cebu.