Balik na usab kita sa atong naandan nga gimbuhaton human sa pipila ka adlaw nga pagpahuway ug pamalandong sa Semana Santa. Ang uban nakabakasyon og maayo gumikan kay way trabaho ug dili usab busy sa mga kalihukan sa simbahan kay kanselado ang ubang kalihukan. Sa akong bahin, naka-relax og maayo gumikan kay didto man ko sa probinsiya nag-obserbar sa Mahal nga Adlaw.
Mibisita ug miestar ko sa AC Tilapiahan Fishing and Family Park sa Campangga, Barili nga gipanag-iya sa akong higala nga si retired PC/INP officer Tito Causin. Duol kini sa Mantayupan Falls. Mingaw ang lugar gumikan kay gitaliwad-an sa dagkong punuan sa mga kahoy. Adunay swimming pool sa mga hamtong ug mga bata. Ang makalingaw mao ang pagpamasol og tilapia. Ang imong kuha puwedeng ipaluto aron sud-anon. Naay kabayo nga puwedeng sakay-sakayan. Mga tingog lang sa mga gangis ang atong mabati panahon sa kagabhion. Maka-relax kag maayo. Puwede kang magpaluto sa imong paboritong lokal nga pagkaon sama sa manok Bisaya ug prito, sinugba, kinilaw nga tilapia. Affordable ra ang ilang room rate.
Black Saturday hangtod Easter Sunday didto na usab ako mi-estar sa Blue Space Beach Resort sa Candugay, Barili nga gipanag-iya sa magtiayong Jay ug Maridel Ruiz. Nindot sab nga lugar kay adunay floating cottages ug diving board. Maka-relax ka og maayo kay way esturbo. Tinapyas lang sa mga balud sa dagat ang imong mabati panahon sa kagabhion. Affordable ang entrance ug room rate. Maka-order kag pagkaon ug ilimnon. Puwede magbawon nga way corkage fee. Ang mag-asawang Ruiz nag-develop usab og mountain resort sa barangay Mayana, usa ka mountain barangay.
Si Barili Mayor Julie Flores nakadalikyat og bisita nako sa Blue Space beach sa Candugay. Iyang gibutyag nga usa sa iyang hatagan og pagtagad mao ang pagpalambo sa turismo kay daghan ang mga nagsalig niini. Daghang potential nga tourist sites ang Barili mao nga iyang gi-awhag ang mga magpapatigayon sa lungsod nga mo-invest. Matod pa ni Mayor Flores nga iyang gisuportahan ang mga kalihukan ni Gov. Gwen Garcia sa pagpalambo sa turismo. Maoy hinungdan nga iyang nahuna-hunaan ang rebranding sa Barili ngadto sa “Jolly and Fun” kay malingaw ka.