Nikalas na usab og duha ka kinabuhi ang Transcentral Highaway human motorsiklo gidaro sa usa ka sports utility vehicle (SUV) sa alas 11:40 sa buntag sa Lunes, Abril 5, 2021 sa Brgy. Gaas, Lungsod sa Balamban.
Si Deal Lungay Estrada, 30, dalaga, taga V. Rama Street, Brgy. Guadalupe, Dakbayan sa Sugbo, patay nang niabot sa tambalanan sa lungsod sa Balamban.
Samtang namatay alas 4 sa hapon Lunes si Winston Disoyo Alatraca, 33, dunay kapuyo taga Brgy. Labangon, Dakbayan sa Sugbo.
Gitangong si Kirk Mharwin Labiste, 22, ulitawo, taga Brgy. Lawaan, Dakbayan sa Talisay.
Si Labiste maoy nagmaniho sa puti nga Ford Ranger pickup samtang naangol iyang pasahero nga si Reslie Cardama, 18, taga Barangay Tisa, Dakbayan sa Sugbo.
Si Police Staff Sgt. Donald Pitogo, imbestigador sa Balamban Police Station nga nahinabi sa Superbalita Cebu, nagkanayon ang mga biktima gikan sa Dakbayan sa Sugbo padulong sa Balamban.
Samtang si Labiste gikan sa Balamban padulong sa Dakbayan sa Sugbo.
Ang mga kabanay sa mga biktima niingon nga padulong unta sa buhatan sa Land Transportation Office (LTO) sa Balamban.
Samtang nagsubida sila si Estrada ug Alatraca sa kurbada nga dalan, gikasugat nila ang pickup nga nagbahada nisulod sa ilang lane.
“Kusog ang dagan sa SUV pickup ingon ni si Winston. Mikawat sa ilang lane gidaro sila,” dugang ni Pitogo.
Si Alatraca nakasulti pa nga ang tag-iya sa Honda Click mao si Estrada, kinsa maoy nagmaniho.
Matod pa ni Pitogo, nga gumikan sa kakusog sa impact, nangalagpot ang mga biktima mga 15 metros.
Si Labiste nitug-an sa kapulisan nga nawad-an siya og kontrol sa manobela human nawad-an og brake ang iyang sakyanan.
Si Nanette Cortes, tag-iya sa balay diin nahitabo sa tungod ang aksidente, niingon nga nisulti si Labiste nga nahutdan og brake fluid ang iyang sakyanan.
Wa dayon sila maka-contact, bisan ang mga pulis, og rescue personnel kay way signal sa cell phone sa dapit.
Matod ni Cortes nga ang bahin sa TCH atubangan sa iyang balay nga kurbadaho ug dulhugon accident prone. Niadtong Dominggo, Abril 4, matod niya nga duha ka mga motorsiklo ang na slide sa karsada.