SUPERBALITA DAVAO

Talento: Inner Engineering

Panlantaw

HELLO, sis ug bro! Kumusta ang atong mga palibot, kinabuhi ug mga panghitabo? I miss you hurot mga ka-Super B! Dugay-dugay na pod ta wa maka-chicka apan... dili gayud mo mawala sa akong "flat" apan "sinsero" nga dughan, higala.

Sa gihapon, ang atong kaayohan, kabaskog ug padayong paglayat sa sa kalibutan anaa ra tanan sa grasya ug gamhanang kamot sa atong Magbubuhat busa kanunay kitang magpasalamat-hallelujah!!!!

Mas taas ang panahon nga nakatutok sa social media ning inyong kiat nga higala kay dili pa man kita sa gawas makalakwatsa, right? Sa mga bidyo nga akong nasulagmaan, akong nailhan si Jaggi Vasudev o mas ilado sa angga nga "Sadhguru." Usa ka Indian nga magtutudlo sa kultura sa yoga sugod sa 1982 hangtud sa kasamtangan ug manunulat pod.

Sa iyaha nako nakat-onan ang titulo sa topiko nato. Matud ni Sadhguru nga ang atong kalibutan, apil kitang mga katawhan dili perpekto busa adunay gayuy mga problema. Pero, sukwahi sa kadaghanan nga ibasol sa kaugalingon ug palibot ang mga imperpeksyon sa kinabuhi... si Sadhguru nagadasig sa pagdawat niini, ug pagpadayon sa kinabuhi nga dunay kabag-ohan dili sa uban, sa gobyerno o kanasuran apan sa atong mga kaugalingon.

Ang prinsipyong "inner" o "kinasudlan" ug "engineering" o "paggama o pagtukod" sama sa mga ginabuhat sa mga enhenyero nga mga istraktura (balay o patigayon), magasugod sa atong tagsa-tagsa nga pag-ila sa atong mga kaugalingon ug mga sitwasiyon nga atong nasudlan.

Libog na ka? Ingon ani ni... dili ba nagkataas ang ihap sa natakdan sa Covid-19 sa nagkadaiyang dapit? Kung atong iaplikar ang "inner engineering" nga solusyon o pamaagi; dili nato sige'g kuwestiyunon ang pamalakad sa gobyerno bisan sukwahi kini sa ideya nato. Dili pod nato batukan ang kompaniya nga wala naghatud sa atong gi-order na unta nga bakuna bisan nakahulam na kita'g pangbayad niini kay "short" tinuod ang supply.

Ang inner engineering magtukmod kanato sa pagsuta sa atong mga kaugalingon kung unsaon nga dili kita matakdan sa Covid ug magdungag sa problema sa katilingban pinaagi sa mga lakang nga kaya ra nato kaayong masolusyonan. Sama sa???? pagpabaskog sa atong mga kalawasan (hustong kaon ug tulog, disiplina ug ehersisyo), paggamit sa atong oras nga mas episyente sama sa pagpangita'g dugang panginabuhian pinaagi sa pagtanum bisa'g kamatis ug sibuyas sa atong nataran gamit ang mga lata o plastik nga anaa ra sa daplin. Malibre na ka sa lamas, mamahimo pang mabaligya. Puwede pod manahi og short pants o kurtina dili nang sige'g bisita sa silingan unya tagay-tagay ang tirada ang ending kasamok ra sa kahubog o tsismis kaha.

Kaya natong ampinga atong mga kaugalingon sa dili pag sige'g laag igsuon. Kung mogawas man kay sa panginabuhian, maglikay sa posibleng pagdakop sa kagaw pinaagi sa pagsuot og face mask ug shield ug social distancing. Kining mga simpleng pamaagi kung atong seryusohon, dako kining solusyon sa pagpaubos sa atong mga problema, ug makatabang pa gayud sa isig-kaingon ta.

Undangi nang sige'g batikos, reklamo o pagbagulbol. Tabangan hinuon nato ang atong mga kaugalingon na mahimong produktibo. Likayan pod nato nga makahasol sa uban kay duna pod na silay hagit nga ginaatubang. K? Mwaaah!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph