Girekomindar sa Cebu City Police Office (CCPO) ngadto sa market administrator sa Carbon nga di na pasudlon ang mga electric o e-bike sa merkado kay usa sila sa nakamugnag kahuot sa mga agian ug nakadugang sa dasok sa mga sakyanan.
Kini human sa gipatuman nga nagdili sa mga pribadong sakyanan nga makasulod sa Carbon Public Market tungod sa pagpangandam sa miaging Semana Santa diin mihapsay ang maong merkado.
Apan sa dihang giablihan pag balik ang karsada nidagsa na usab ang mga pribadong sakyanan ug ang mipasulabi mao kining mga e-bike nga nagpasagad matod pa sa pag parking.
Tungod niini si Police Lieutenant Colonel Wilbert Parilla sa CCPO nagkanayon nga nasabotan atol sa command conference sa CCPO nga ilang i-rekomendar sa market administrator nga did-an sab ang e-bike nga makasulod.
“They are not really allowed sad dinhang lugara but considering nga mao sad ni pangita o panginabuhian sad sa kadaghanan dinha mao nang atong buhatan og regulation atong i-regulate sila,” matod ni Parilla.
Dugang ni Parilla nga ang mga e-bike dili mahimong ka-isyuhan og citation ticket sa traffic enforcers sanglit dili man sila matawag nga sakyanan tungod kay wala man kini makina.
Ang solusyon niini mao ang pag dili kanila sa pagpasulod aron magpadayon ang kahapsay sa dalan ug mahapsay usab ang pagsulod sa mga mamalitay sa Carbon area. (AYB)