Balik nang Angkas, apan pagdala’g imong helmet

Nibalik na ang operasyon sa motorcycle taxi-hailing service, Angkas, aron mamasahero sa dakbayan sa Sugbo, Talisay ug Mandaue City.

Apan di sama kaniadto, ang mga pasahero kinahanglang magdala og kaugalingong helmet sa ilang pagsakay samtang naa pa ang hulga sa coronavirus disease 2019 (Covid-19).

Sa wala pa ang Angkas, ang mga habalhabal padayon gihapon nga namasahero pinaagi sa pagpara sa mga pasahero.

Apan karon, ning pagbalik sa Angkas, mahimo na nga mag-book para kuhaon ka sa imong nahimutangan.

Ang paagi sa plete mahimong ipaagi sa e-cash, credit o debit sanglit gidid-an sila paghimo og physical contact sa mga driver.

Aduna nay daghang mga motorsiklo, kansang mga driver nag-uniform og Angkas nga adunay dala nga barrier nga gitaod sa buko-buko aron malikayan ang physical contact tali sa ilang pasahero

“Passenger transport is back in Cebu. Make sure to check out the guidelines first before riding, “ tipik sa post sa social media page sa Angkas.

Ang operasyon sa Angkas nahunong niadtong paghunat sa mga kaso sa Covid-19 diin walay gitugotan nga makabiyahe panahon sa enhanced community quarantine (ECQ).

Sukad sa Septiyembre 2020, ang Cebu City ubos na sa modified general community quarantine (MGCQ). (PAC)