Moabot na og 650 ka mga modernized jeepneys ang gadagan, mayoriya naa sa dakbayan sa Sugbo, paingon sa Lilo-an sa north, ug Minglanilla sa south.
Si Regional Director Eduardo Montealto Jr., sa Land Transportation Franchising and Regulatory Board ( LTFRB) 7 nagkanayon nga aduna pay dugang 170 ka mga unit nga sa umaabot nga mga semana modagan gikan sa mga kooperatiba sa mga driver.
Mayoriya sa mga modernong PUV nagbiyahian sa Cebu City, Mandaue City, Lapu-Lapu City, Talisay City, Minglanilla, Consolacion ug Liloan.
Matod pa ni Montealto nga naabot na sa Sugbo ang 170 ka mga unit, apan padayon nga giproseso ang ilang mga dokumento aron makabiyahe na sa labing dali nga panahon.
Ang mininum nga pletehihan sa modernized jeepney nagkantidad og P9 sa dili air-conditioned ug P11 alang sa mga air-conditioned unit.
Matod sa pangulo sa LTFRB-VII nga dinhi sa Central Visayas, adunay gibanabana nga 4,000 ka mga modernized jeepneys ang modagan inig abot sa Disyembre, 2021.
Niadtong Marso 31 ang katapusang adlaw sa pag-consolidate sa mga driver, kinsa nanag-iya og kanhi karaang mga PUJ ug nipahimulos sa kahigayonan nga makakuha og bag-ong unit pinaagi sa pagtukod og kooperatiba.
Dako og gikatabang ang mga modernized jeepney sanglit kapin lang sa 400 ka mga tradisyonal nga PUJ ang gitugotan nga makadagan gumikan usab sa limitado nga rota.
Ang mga TPUJ niagi og makuti nga inspeksyon sa mga unit, apil na ang mga driver, aron malikay sa coronavirus disease 2019 (Covid-19.). (PAC)