Ang ubang mga tawo molikay sa ospital bisan dunay laing gibati sa ilang lawas kay basin bunyagan sila nga dunay Covid.
Bahala og maglisod na sila, motago lang sila sa ilang balay ug di gyud magpakita sa ospital.
Ang uban sab mangadto sa ospital kay nagkinahanglan og tabang apan ang mga ospital mobalibad. Ang mga rason--walay bakante, dunay nagpila ug hulaton lang kon dunay bakante usa pa makasulod ang pasyente.
Mao kini ang hinungdan ngano nga wa magkadimao ang gipanulti sa Department of Health (DOH) ug sa mga tawo nga namatyan tungod kay wala makasulod sa ospital.
Matod ni Health Secretary Duque, 79 porsyento lang kuno sa mga ospital beds ang nagamit pero matod pa sa mga namatyan, wa gyod sila pasudla sa mga ospital bisan asa na sila mangita kay puno na kuno.
Kinsa man kahay tinuod ani?
* * *
Daghan na nga mga higayon nga dunay mga nangamatay nga gibunyagan og Covid bisan kon wa gyod magpakita og symptoms ang mga namatay.
Sayon ra kaayo sa mga doktor o mga ospital nga mobunyag og Covid bisan kon mismo mga sakop sa pamilya sa namatay segurado nga dili Covid ang sakit sa namatay.
Mao kini hinungdan nga nagtuo ang mga tawo nga dunay negosyo nga nahitabo sa pagbunyag og Covid sa mga nangamatay. Parehas ni sa ako nahibaw-an sa una sa PNP.
Pirmi gyod nang dunay “sightings” sa ilang report. Sama sa wala gyoy pagka-human ang giyera sa mga NPA.
Unsay rason niini?
Matod pa sa usa ka amigo nga chief of police, “SOP na na namo Sir. Kon walay ‘sightings,’ mogamay o mawala among budget sa counter-insurgency. Mao nay hinungdan nga ibutang gyod na namo sa among report.”
Susmariosep.
Parehas ba kaha ni sa Covid?
* * *
Ngano kaha nga kon mosaka gani ang presyo sa mga baboy o manok, abtik kaayo ang gobiyerno mopagawas og ayuda o subsidy?
Apan kon moubos gani ang presyo sa baboy o manok, wa gyoy mogawas nga ayuda sa mga namuhi og baboy ug manok?
* * *
Matod sa Pagasa, nagsugod na kuno ang dry season. Angay kuno mag-andam ang tanan alang sa panahon nga mag-nihit na sab ang ulan.
Bad news sa mga mag-uuma.
Apan sukwahi sa gisulti sa Pagasa, padayon man gihapon ang ulan. Gani, kusog man ang ulan. Naunsa man kining pagka-butanga?