Nakugang ang mga Sugboanon sa alegasyon batok sa 13 ka mga pulis sa Sawang Calero Police Station sa Cebu City Police Office (CCPO). Ang 11 gipasanginlan sa kanhi drug personality nga babaye sa Minglanilla nga nihulidap kaniya, usa niini iyang gipasanginlan nga ninglugos kaniya sud sa usa ka motel.
Ang laing unom ka mga sakop sa samang police station gipasanginlan sa laing babaye nga kanhi drug user nga nisuway og hulidap kaniya ug ni-torture sud sa usa ka lawak likod sa police station. Apan wa nay naabtan ang Commission on Human Rights (CHR) 7 nga niduaw sa buhatan sa Martes sa buntag, Abril 6, 2021. Gihimo nang maorag bodega ang dapit.
Kon tinuod man ang alegasyon sa mao nga mga babaye batok sa mga pulis sa Sawang, kini nagpakita nga bisan sa paninguha sa administrasyong Duterte sa paglimpyo sa hut-ong sa kapulisan, naa gihapon ang mga scalawag.
Kana bisan kon ang suweldo sa mga pulis gipatas-an og maayo ni Presidente Rodrigo Duterte sa tumong nga di na matintal sa pagpangurakot. Apan kon lagi tinuod ang alegasyon nga hulidap, kini nagpakita nga di diay matagbaw ang pulis sa taas nga sweldo. Kinahanglan pa nilang mangilkil.
Di ba dunay pulis nga gi entrap tungod kay giingong nangilkil lang og P3,000? Kini timaan sa paghinakog.
Di diay sa sweldo lang mapugngan ang kurapsyon sa hut-ong sa kapulisan. Gikinahanglan diay ang pagtanom sa kultura sa katarong ug kaligdong alang sa tinud-anay nga pagpanerbisyo. Kon nakagamot na ang kurapsyon sa usa ka pulis, bisan pag P1 million ang iyang binuwan nga sweldo, mangilkil gihapon siya.
Sagad ra ba sab aning kurakot nga mga pulis namatud-ang mga bisyuso, ang uban dunay ikaduha nga pamilya.
Di ba maayo nga ang pulis nga dunay bisyo, sama sa pagpangabit ug sugarol, angay taktakon sa serbisyo? Kay kini di maayong mga tilimad-on sa usa ka tigpatuman sa balaud. Dali ra siyang matintal sa pag-abuso sa gahom.