MAAYONG adlaw sa tanan!
Balik na sab ta paghisgot sa mga natural nga mga nagakahitabo sa atong palibot nga makakutaw sa atong panghuna-huna.
Sa kusog nga pagtaas sa mga nagka-Covid labi na didto sa kaulohan sa Luzon, gikahibulong sa katawhan uban ang pangutana, ni-epikto ba ang mga bakuna kontra Covid?
Kon dili ipugos sa gobyerno ang pagpabakuna sa katawhan, daghan ba kaha ang motahan sa ilang kaugalingon aron magpabakuna?
Sa rekord niadtong Marso 23, mokabat pa lang sa 508,332 ang mabakunahan sukad gisugdan ang Covid vaccination niadtong unang adlaw sa bulan sa Marso.
Mikabat na sa 812,760 ka Pinoy ang nalista nga positibo sa Covid virus kagahapon diin 646,381 ang natala nga nangamatay.
Apil sa bag ong nadiskubrehan nga mga kaso sa sakit ang pipila ka frontliners nga nabakunahan na ug nagdahom nga safety na sila apan dili diay.
Handom sa atong gobyerno nga makab-ot ang 70 million ka Pinoy ang mahatagan sa bakuna human karong tuiga apan dili kini garantiya nga luwas na ang katawhan kon mabakunahan ka.
Ang kahadlok sa Covid virus magapabilin nga hulga alang sa nagatoo nga naa kining kagawa apan kon katawhan ang pabut- on, mas ilang pilion nga manggawas sa ilang balay aron manginabuhi kay pait na kaayo ang ilang kahimtang karon.
Sa panglantaw sa Octa Research, mosipa pa daw ngadto sa 1 million ang ihap sa biktima sa Covid sa atong nasud inig kahuman sa kasamtangang bulan sa Abril.
Dili imposible kon magpadayon ang kaso sa Covid sa Luzon diin kapin sa napulo ka libo ang matala nga positibo sa usa ka adlaw.
Kon mahimong daghan ang natakdan sa usa ka komyunidad, dili gyud ikalipay sa katawhan kay dili ta maka-enjoy sa atong mga katungod panahon sa lockdown.
Dili sab madungan pagpalit ug ipundo ang mga vaccine kay halos tanang nasud isig paningkamot nga makakuha gikan sa mga nasud nga gitugotan na sa Food and Drug Administration nga mga bakuna alang sa mga Pinoy.
Nadugangan ang pagbagulbol sa katawhan tungod dili sab basta-basta makapalit ang pribadong sektor direkta sa mga nagabuhat sa bakuna kon walay pagtugot sa Food and Drug Administration.
Gawas nga nihit pa gihapon ang suplay sa vaccine ug wala pa makita ang piho nga epekto ngadto sa katilingban, unsa pa man ang pulos sa vaccine nga dili man kini tambal apan unta depensa man nga dili ta mataptan?
Sa pinulongan nga Tagalog, ang panultihon nagkanayon nga "Aanhin pa ang damo, kung patay na ang kabayo?"