NAGPAHIANGNO ang buhatan sa Municipal Disaster Risk Reduction and Management (MDRRMO) sa M'lang, North Cotabato ngadto sa katawhan nga magbantay batok sa mga halas o bitin nga posibleng moatake sa bisan kinsa ning panahon sa ting-init.
Sumala ni MDRRMO officer Bernard Tayong II nga ning panahon sa ting-init, seguradong manggawas ang mga bitin aron mangita og mga lugar nga bugnaw ug didto mamahulay.
Labaw nang gipasidan-an ni Tayong ang mga mag-uuma kay kasagaran, sila ang peligrong atakihon sa mga halas sa ilang mga kaumahan.
Kahinumdoman nga usa ka lala nga banakon ang napatay sa mga mag-uuma alas 9 sa buntag, Martes, Abril 6, 2021, sa nahisgutang lungsod.
Matud ni Edward Bartolo nga samtang nanghinlo siya sa iyang Pomelo farm, uban sa iyang mga trahabante sa Purok Acacia, Barangay New Rizal sa maong lungsod, ilang nasiplatan ang bitin nga nagkabyon sa punoan sa buungon.
Miaksiyon na unta og pahit ang banakon (King Cobra) apan gitabangan siya og puspos sa mga mag-uuma.
Ang napatay nga bitin dunay gitas-on nga napulo ka tiil ug dako ang lawas.
Gidala ni Bartolo ang banakon ug gitunol ngadto sa buhatan sa MDRRMO sa lungsod.
Kahinumdoman nga daghan na sab nga banakon ang napatay sa mga molupyo sa probinsiya ug dunay mga namatay human makapaaki niini.