ALCEA MANINGO
Cangyan, Carmen, Cebu
Usahay mapikal si Celia sa iyang bana nga si Elmer. Subra kini kakutihan sa iyang kabuotan. Samot na ron nga hapit na ang ika-37 nga sumad sa ilang kasal.
Human nilag paniudto karong Dominggoha mitan-aw sa TV si Celia. ASAP ang salida. Si Elmer nagbasa sa Bibliya nga Iningles. Ang lamesa-basahanan niya diha ra sa luyo sa sopa nga gilingkuran ni Celia. Buntag, udto ug hapon si Elmer nga magbasa sa Bibliya, labi na sa adlawng Sabado ug Dominggo. Kusgon gyud niya iyang tingog kon magbasa, morag magsisibya sa balitang Iningles. Usa ka CPA si Elmer. Naghugon-hugon nga mo-retiro na kay senior ciizen na. Si Celia nakahuman sab sa Accountancy apan wa mokuha og board exam. Duha ilang anak, si Myrna ug si Maricor, nga puro na propesyonal ug nangaminyo na. Sila na lang mga tiguwang magtiayon sa ilang balay. Ug nag-agwanta si Celia sa kabuotan sa iyang bana nga way sama.
Pagkahuman og basa ni Elmer sa Bibliya mitupad siya paglingkod kang Celia.
“Wa ka ba sabai sa akong pagbasa?” sukot ni Elmer. “Wa man ko moreklamo!” ni Celia. “Posible man nga gisabaan ka, pero wa lang ka moreklamo,” ni Elmer. “Ganahan ra man kong naminaw,” ni Celia.
“Di na maoy akong pangutana. Tubaga lang akong pangutana. Ni-care baya ko nimo. Gusto ko nga komportable ka sa atong panimuyo. Posible nga di ka komportable, wa lang ka moreklamo. May katungod ka sa pagreklamo. Prangkahi ko sa tinuod nimong gibati ug gihunahuna,” ni Elmer. Mituyok ang mga kalimutaw ni Celia. “O, sige. Klaruhon nako. Wa ko sabai. Giganahan ko naminaw. Kasabot na ka?” “Salamat. Unsay nahunahunaan nimo sa atong anibersaryo?”ni Elmer. “Sunod semana na man diay to, no?” ni Celia. “Mangaon lang ta sa gawas. Wa man tay badyet sa dakong hikay.” “Pwede mag-renew ta sa atong marital vow?” ni Elmer. Wa gyud silay problema sa kaminyuon mahitungod sa ‘third party.’ Selosa kaniadto si Celia, apan milutaw nga wa siyay angay selosan, kay grabe kamatinud-anon si Elmer. Hinuon, karong nangatiguwang na sila, morag si Elmer na ang na-seloso. Batan-on gihapon og hitsura si Celia ug maayo pang mangareglar sa iyang lawas. Daghan pang mga lalakeng makalingi kang Celia kon mopaso. “Pwede kaayo,” ni Celia. “Una, magpinsayloay ta sa tanan natong nasulti ug nabuhat nga sayop o dautan.” “Okey ko ana,” ni Celia. “Dayon, dayegon nato ang maayong nabuhat ug nasulti,” ni Elmer. “OK,” ni Celia. “Sunod, sawayon nato ang dautang nabuhat ug nasulti,” ni Elmer. “OK,” ni Celia. “Dayon, prangkahay sa hinay nga pagkasulti, way kasuk-anay, way singkahay, kon may dautang pagduda,” ni Elmer.
“Unsay buot mong ipasabot?” ni Celia.
“Kon duna kay pagduda sa akong pagka tawo, isulti nimo nako. Kon tinuod, angkunon nako ug mangayo kog pasaylo. Kon di tinuod, inigar nako ug kalimtan dayon sa buot. Mao sab akong isulti nganha nimo,” ni Elmer. “OK,” ni Celia.
“Dayon, magpangutan-anay ta, wa ka bay pagmahay sa lakaw sa atong kinabuhi? Wa ka bay angay usbon?” ni Elmer.
“Nindot. Duna koy angay usbon. Kanang imong pag-atake sa ubang relihiyon,” ni Celia.
“Lisod na maurong. Sugo man sa Diyos nga isangyaw ang kamatuoran,” ni Elmer.
“OK, ako lay sangyawi, imong mga umagad, mga apo, aron di ka kakitag away. Kuyaw hipatyan ka sa mga panatiko sa ilang relihiyon,” ni Celia.
“Ayaw kahadloki ang makapatay sa lawas. Ang angay kahadlokan, ang makapatay sa lawas ug kalag,”ni Elmer.
Ganiha rang gusto ni Celia nga maputol ang panag-estoryahay nila ni Elmer. Unya may kasikas gawas sa ilang pultahan. Nadungog niya ang mga tingog. Nangabot sila Myrna ug Maricor kuyog ilang mga bana ug mga anak. Nagpasalamat siya nga naputol ilang panagkabildo ni Elmer. Napikal kaayo siya sa subra nga kabuotan sa iyang bana.
(KATAPUSAN)