Plano nga igahin sa Cebu City Government ang Abril 7 matag tuig isip paghinumdom kang Rajah Humabon.
Magbutang usab og Rajah Humabon isip ngalan sa usa ka karsada pahinungod sa hari sa Cebu dihang niabot si Ferdinand Magellan niadtong Abril 7, 1521.
Kini ang gipadayag ni Bise Mayor Michael Rama kinsa maoy namulong atol sa hamubo nga wreath laying ceremony nga maoy labing una alang kang Humabon sa Plaza Hamabar, duol sa Cebu Metropolitan Cathedral.
Ang bise mayor kinsa maoy chairman sa Committee on Historical Affairs Commission (Chac) nagkanayon nga di angay hikalimtan ang kasaysayan nga dakong gikatabang sa paglambo sa dakbayan.
“Never destroy what will remember the past, for you are a contributor to the extinction of humanity,” padayag ni Rama
Ang Chac nga gikatakdang mopalabang og resolution para mahimoan og ordinansa sa City Council para sa pormal nga pagdeklarar ug pagpangita og dalan nga ipahinungod kang Humabon.
Samtang gipakita na sa publiko ang quincentennial marker nga gikan sa National Historical Commission (NHC) nga nahimutang sa Plaza Sugbo, duol sa Magellan’s Cross ug Basilica Minore del Sto. Niño.
Gitambongan ni Mayor Edgardo Labella, Rama, Secretary Michael Dino, ug mga heneral sa Armed Forces of the Philippines ug ubang dinapit gikan sa lainlaing ahensiya sa gobyerno ang ceremonial unveiling sa historical marker.
Sa marker, nakasulat ang detalye sa pagbiyahe ni Magellan nga niabot sa Sugbo niadtong Abril 7, 1521 nga gidawat sa grupo bi Rajah Humabon nga maoy lider sa Sugbo.
Si Humabon ug iyang asawa nga si Juana ang labing unang Pilipino o Cebuano nga nabunyagan nila ni Magellan para mahimong Katoliko.
Siya ginganlan og Carlos isip pahinungod ni Haring Carlos I sa Espanya.
Si Labella maoy nidawat sa marker gikan sa NHC isip mayor sa Dakbayan sa Sugbo. (PAC)