Gipahibawo ni Mayor Edgardo Labella nga moabot sa dakbayan ang libuan ka doses sa Astrazeneca ug Sputnik vaccine gikan sa national government alang sa frontliners ug senior citizens karon o sunod semana.
Ang mayor nibutyag nga inig abot sa bakuna, siya ang unang magpabakuna aron pagdasig sa mga senior citizen nga magpa-inject para mabatokan ang Covid-19.
Si Labella, 69, nagkanayon nga diyutay ra sa senior citizens ang nagpalista nga gustong mabakonahan. Siya nanghinaot nga sa iyang pagpabakona, madasig ang mayoriya sa mga hamtong.
Samtang iyang gipahibawo nga mobalik na ugma, Abril 8, ang vaccination alang sa mga barangay health worker ug volunteers sa dakbayan nga ipahigayon sa Robinson Galleria de Cebu ug UC Banilad.
Nahunong ang vaccination sa maong mga sector nga gisugdan sa wa pa ang Holy Week sanglit nahutdan sila sa vaccine.
Apan karon gipadayag sa mayor nga aduna nay husto nga suplay alang sa ilang unang dose sa Astrazeneca o Sinovac.
Paglabay sa 30 ka adlaw, itusok na usab ang ikaduhang dose sa vaccine apil na ang mga medical health care workers nga nadestino sa Cebu City Medical Center ug samang mga buhatan.
Dugang sa mayor nga hangtod aduna pay ihatag nga suplay ang national government, dili una mogasto ang City Government sa ilang kwarta para pagpalit og bakuna aron magasto sa husto nga gidaghanon sa bakuna ug maapod ang mga Sugbuanon. (PAC)