SUPERBALITA CEBU

Editoryal: Way nahadlok

Editorial Cartoon by Ariel Itumay

Laing duha ka mga kinabuhi ang nangakalas sa aksidente sa Transcentral Highway human mabangga ang usa ka sports utility vehicle (SUV) sa usa ka motorsiklo. Ang duha ka mga sakay sa motorsiklo nangamatay.

Di lang kadto ang aksidente nga natala sa TCH, labina sa habig sa Gaas, Balamban. Ang barangay, uban ang kapulisan, nagbutang na og billboard nga nagtala sa mga aksidente aron pagpahinumdom sa publiko sa kakuyaw sa karsada.

Naa say mga estorya nga ipahunong ang pagpanguha og hulagway sa mga magmotorsiklo nga moagi sa nagkadaiyang bahin sa TCH. Kay kuno tungod sa pagpanguhag mga hulagway, maggara-gara sa pagpadagan ang mga driver sa mga motorsiklo.

Kataw-anan baya ni kay bisan wa pa ang manguha og hulagway, daghan na diha ang mga aksidente. Ang tinud-anay nga hinungdan sa mga aksidente, sa bisan asa, mao ang reckless driving kun mapasagaron nga pagmaneho.

Daghan sa mga driver nga mangagi sa TCH kusog kaayong makapadagan, maorag naglumba. Ang drayber sa SUV, kon basehan ang kadaut sa motorsiklo ug sulti sa mga saksi, kusog kaayong nakapadagan sa sakyanan.

Panahon na nga hatagan og aksyon sa kagamhanan ang mga aksidente sa TCH, labina karon nga nanaghan ang mga tawo nga manungas taliwa sa coronavirus pandemic. Gikinahanglan ang pagkontrolar sa gikusgon sa mga sakyanan nga mosubay sa TCH.

Lisod ba? Kon nahimo sa Davao City ang pagdisiplina sa mga drayber pinaagi sa modernong mga ekipo sa trapiko, nganong di man dinhi sa Sugbo? Malampuson ang Davao City sa pagpatuman sa ilang speed limit pinaagi sa speed gun ug gimontar nga mga CCTV sa traffic monitoring. Way pasayloay sa mga nakalapas.

Panahon na nga ang traffic bodies sa Balamban, Dakbayan sa Sugbo ug Land Transportation Office (LTO) maghisgot aron maminusan og maayo ang mga aksidente sa TCH. Di lang kutob sa statistics aron manghadlok. Uroy, way nahadlok.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph