MISAKA ang recovery rate sa Cagayan de Oro human kini nakatala og 27 ka mga bag-ong nakarekober nga mga coronaviru-positive nga mga pasyente.
Ang kinatibuk-ang ihap sa mga nakarekober nga mga pasyente miabot na sa 3,845. Ang recovery rate sa dakbayan anaa na sa 91.82 percent.
Sa maong 3,845, 303 mga locally stranded individuals (LSIs), 121 mga returning overseas Filipinos (ROFs), ug 3,421 mga lokal nga kaso (community: 2,896; Apors: 525).
Nakatala usab og 14 ka mga bag-ong kaso sa coronavirus disease (Covid-19) ang Cagayan de Oro, pulos mga local transmission.
Sumala ni City Health Officer Dr. Lorraine Nery, sa 14 ka mga bag-ong lokal nga kaso, tulo niini mga local authorized persons outside residence (Apors), lima mga local index nga mga kaso, ug unom ang mga local cases with link.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 4,224.
Sa 4,224 nga kinatibuk-ang kaso sa Covid-19 sa syudad, 431 mga ROFs/LSIs ug 3,793 mga local transmissions.
Matud ni Nery, sa 3,793 nga mga local nga kaso, 189 niini mga persons deprived of liberty (PDLs), 2,026 mga local index cases, ug 1,577 mga local cases with link.
Ang Cagayan de Oro adunay 179 ka mga active cases, 50 niini na-admit sa Northern Mindanao Medical Center ug uban pang mga ospital sa syudad, 124 mga outpatients, ug lima mga ROFs/LSIs.
Ang ihap sa mga namatay sa Covid-19 sa syudad naa sa 200.