SUPERBALITA CEBU

P70,000 incentive sa moadto’g NCR

LOKAL nga mga opisyal, lakip na ang Office of the Presidential Assistant for the Visayas (Opav) misaad og kinatibuk-ang P70,000 nga cash incentive sa matag usa sa 50 ka medical workers sa Sugbo.

Ang 50 nga nanglarga sa Miyerkules, Abril 7, 2021 padung sa National Capital Region (NCR) Plus aron moabag sa nasudnong kagamhanan sa pag-atiman sa mga pasyente sa coronavirus disease (Covid-19).

Sa wa pa sila molarga isip unang batch sa 100 nga target sa kagamhanan aron iabag sa mga dapit sa Luzon nga naigo og maayo sa coronavirus pandemic, usa ka send-off ceremony gipahigayon sa Montebello Villa Hotel.

Ang NCR plus naglakip usab sa mga lalawigan sa Bulacan, Cavite, Laguna ug Rizal.

Atol sa sendoff ceremony, sila si Opav Secretary Michael Lloyd Dino, Cebu Gov. Gwendolyn Garcia, ug Cebu City Mayor Edgardo Labella ningpahibawo nga matag buhatan nila mohatag og cash incentives wa pay labot sa ilang basic salary.

Nipahibawo si Dino nga ang Opav mohatag og P5,000 cash incentive matag buwan sa mosunod nga tulo ka mga buwan.

Si Garcia sunod usab nga nipahibawo nga ang Kapitolyo motugbang og laing tag P5,000 matag buwan matag medical worker.

Iya ning dungan og P10,000 matag usa sa pagpanguli na nila.

“Mao na nga gawas sa tag P5,000 a month nga itugbang sa Probinsya sa Sugbo alang kaninyong tanan ug I understand moabot mog usa ka gatos kabuok nga atong ipadala, tagaan usab kamo sa Probinsya sa Sugbo og 3-month supply og vitamin C with Zinc, B complex and vitamin A ug patagsaan mo niining aning akong anting-anting nga personal air purifier nga inyong magamit,” matod ni Garcia.

“Inig balik ninyo dinhi, pun-an mo sa Probinsya og tag P10,000,” matod sa gobernador.

Samtang si Labela nisaad nga ang Siyudad mohatag og tag P10,000 matag buwan sa matag usa kanila.

Ang gahin sa Cebu City moabot ngadto sa 100 ka mga volunteer health worker nga gihulagway ni Labella nga nisanong sa panawagan ni Senador Bong Go.

“Cebu City is appropriating for the 100 volunteers, we will be giving P10,000 per month for three months, we make the commitment,” padayag ni Labella.

Dili na bag-o ang pagtabang sa Cebu City Government sa medicial workers sanglit niadtong Agusto, Septiyembre ug Oktubre 2020, ang 1,800 ka medical health care workers nga nagtrabaho sa mga private hospital sulod sa Siyudad sa Sugbo nakadawat og tag P30,000 sa tulo ka mga buwan gikan sa Siyudad. (KFD, PAC, ANV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph