GIKUSTODIYA na sa Talomo Police Station ang drayber sa Fuso truck nga mibangga sa pasaherong dyip pasado alas 12 sa udto kagahapon didto sa Bago Aplaya, Talomo District, Davao City.
Daling miabot ang mga responders ug ang Central 911 human maayong pagkabangga sa Fuso truck ngadto sa likod nga bahin sa PUJ nga dunay rotang Toril-Roxas.
Sumala sa drayber sa trak nga nawad-an na siya og preno hinungdan nga iya kining nabangga ngadto sa mihunong nga PUJ nga nagkuha og pasahero sa loading and unloading area.
Perte sab kurata sa drayber sa PUJ dihang kalit mipaka ang likod nga bahin sa iyang yunit samtang nanyagit iyang mga pasahero.
Nadamay sab ang usa ka pribadong multicab ug gikasamad sa mga sakay niini samtang duna sab mga samaron sa pasahero sa PUJ nga daling gidala sa pinakaduol nga ospital.
Hinuon walay nakabsan sa kinabuhi sa maong disgrasya.
Sukad sa pagsuwat ning balita alas 2 kagahapon sa hapon, wala pa napagawas sa traffic section sa Talomo PNP ang spot report nga anaa ang pangalan sa mga nalambigit sa disgrasya. (Jeepy P. Compio)