BALHOG karon sa selda sa San Pedro Police Station ang magsuon human nangadakpan sa gilusad nga buy-bust operation alas 11 sa gabii, Abril 5, 2021, didto sa Purok 4, 476 Alley, Malvar Street, Barangay 7-A Poblacion, Davao City.
Ang Drug Enforcement Team sa San Pedro PNP, ubos sa superbisyon sa hepe Police Major Jack Tilcag, gilayong nakig-koordinar sa Philippine Drug Enforcement Agency (PDEA) Davao alang sa ikasa nga buy-bust operation.
Nagmalampuson ang operasyon ug nasikop ang magsuon nga sila alyas Richard, 44-anyos ug Marco, 32-anyos, pulos nagpuyo sa dapit.
Nakuha sa ilang posisyon ang 3.35 gramos nga gituohang shabu nga dunay street value nga P25 mil, mga drug paraphernalia ug marked money.
Sumala sa kapulisan sa San Pedro nga dugay na nilang gipanid-an ang ilegal nga lihok sa mga nahisgutan ug miabot sa punto nga mobaligya na kini og shabu.
Kasong pagsupak sa section 5 ug section 11 sa Republic Act 9165 ang atubangong kaso sa mga suspek didto korte. (Jeepy P. Compio)