TACURONG CITY -- Dead on arrival sa balay tambalanan ang Grade 4 pupil nga napusilan sa iyang manghod alas 5:10 sa hapon, Miyerkules, Abril 7, 2021, didto sa Lutayan, Sultan Kudarat Province.
Giila ang biktima nga mao si Angel Bliss Putotan Angcon, nagpuyo sa Purok Pag-asa, Barangay Palavilla sa maong lungsod.
Matud ni Julieta Angcon, inahan sa bata, nga miadto sila sa Sitio Makapol, Barangay Palavilla aron mamutol og kahoy sa lasang nga ilang himuong uling, uban ang kapuyo niini.
Nahibilin sa payag ang biktima ug ang iyang manghod nga 7-anyos didto sa ilang uma duol lamang sa lasang.
Sumala pa nga gidula-dulaan sa magsuon ang home-made shotgun didto sa ilang payag apan sa kalit lang nakablit sa 7-anyos nga bata ang armas hinungdan nga naigo ang maguwang.
Nakaangkon og napulo ka mga samad ang biktima tumong sa iyang dughan. Sa diha nga nadungog sa inahan ang buto sa armas, dali siyang midagan padulong sa payag, kuyog ang kapuyo, ug gisapupo ang biktima nga naligo sa kaugalingong dugo ug gihatud sa South Cotabato Provincial Hospital.
Apan wala madugay gideklara siya sa doktor nga dead on arrival.
Giimbestigahan sa kapulisan sa Lutayan Municipal Police Station ang ama-ama sa bata nga gitumbok nga maoy tag-iya sa 12 gauge shotgun.