SUPERBALITA CEBU

Belga kuhaon sa Warriors

Nabuhi og balik ang negusasyon kabahin sa tinguha sa NLEX Road Warriors nga makuha ang beteranong sentro nga si Beau Belga gikan sa Rain or Shine Elasto Painters pinaagi sa trade.

Taodtaod na sab nasugdan kining maong negusasyon apan kalit lang kining nahilom sa wala pa ang Philippine Basketball Association (PBA) Rookie Draft.

Sa sayo pa, gikataho sa Spin.ph nga sila si Belga ug Vic Manuel mao ang gitinguhang makuha sa Road Warriors nawala kanila si Poy Erram, kinsa nabalhin sa Talk N’ Text (TNT) Tropang Giga sa miaging season.

Nitiklop na ang poruhan sa NLEX nga makuha si Manuel gumikan kay nabalhin na kini sa Phoenix Super LPG gikan sa Alaska Aces.

Ang NLEX naghuwat una sa rookie drafting sa pamasin nga makabira og dekalidad nga big man nga maoy ilang gikinahanglan.

Adunay duha ka picks ang NLEX sa rookie drafting apan wala sila’y nakuha nga bisan usa ka big man.

Ang nakuha sa Warriors mao sila si forward Calvin Oftana isip No.3 overall ug guard David Murell sa second round.

Nakuha man tuod sa NLEX ang kanhi first-round pick nga si Maurice Shaw gikan sa Blackwater pinaagi sa trade apan ang Fil-am nga sentro gituohang dili masaligan sa rotasyon ni coach Yeng Guiao.

Ang gipangita ni Guiao ang adunay sama sa kalibre ni Belga, kinsa aduna pa’y buhing kontrata sa Rain or Shine nga molanat hangtod karong Oktubre ning tuiga.

Basi sa kasaligang tinubdan sa Spin.ph, nausab na og lima ka mga higayon ang detalye sa negusasyon kabahin sa interes sa NLEX kang Belga apan wala pa’y nauyonan ang duha ka mga kampo.

Ang labing ulahing gitanyag sa NLEX ngadto sa Rain or Shine aron makuha si Belga mao sila si Will McAloney ug Kris Porter.

Wala pa’y tubag ang Rain or Shine kabahin niini.

Labing seguro, ganahan sab si Belga nga makabalhin sa NLEX aron ikauban niya og balik si Guiao.

Si Guiao, dili ikalimod, maoy nag-umol sa abilidad ni Belga aron mahimong usa sa labing dekalidad nga sentro sa labing unang professional nga liga sa Asya dihang mao pa kini ang naggiya sa Elasto Painters. (ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph