Grabe gihapon ang iligal nga sugal dinhi sa Sugbo. Dili lamang tigbakay, hantak ug baraha, kon dili ang mga sugal nga gipadagan sa dagkong mga pinansiyer nga dugay nang naila sa mga tinugyanan sa balaud. Kining dinagko nga sugal mao ang masiao nga swertres, small town lottery (STL), mahjong ug on-line sabong.
Kining e-sabong nga gitugotan sa Pagcor gipanag-iya sa dagku ug inilang mga tawo nga ang uban kanila mga piniling opisyal sa gobiyerno. Kini ra silay gitugotan sa paghimo niining maong on-line nga sugal nga maoy gikabuangan sa mga tawo. Ginatus ka milyon maoy makita niining maong e-sabong matag adlaw. Nganong gitugotan man kini ni Presidente Rodrigo Duterte nga iya man kaniadtong gipahunong kining mga on-line nga sugal? Mao man ganing gidudahan nga naa kunoy mga pinalabi sa mga dagkung tawo sa Davao City nga mao na kunoy nagkontrolar sa mga sugal karon sa tibuok nasud. Mahimong dili kini tinuod apan nganong makapadagan man og sugal kining inila na kaayong mga gambling lord sukad pa kaniadtong nanglabay nga administasyon.
Sa tinuod lang, dili molambo kining mga masiao nga swertres, STL ug ubang mga sugal kon walay nagprotihir kanila. Ayaw kog ingna nga way kalibutan ang mga mananakop niining maong iligal na sugal nga mismong ang uban kanila muapil man niini?
* * *
Nalipay ko nga anaay usa ka grupo sa nagpakabanang Sugboanon nga maghimo og regular nga diskusyon sa mga isyu nga may labut ang nasud sama sa pulitika, panginabuhi, kahusay ug kalinaw ug uban pang mga butang nga may labut ang nasud samtang mangape. Ilang gitawag ang ilang exclusive nga pundok og “Puliti-Kape.” Ang nakanindut kay nagkalainlain ang ilang political affiliation apan dili sila mosaway sa mga pulitiko nga sakop sa ubang mga political party. Daghan ka og mahibaw-an ug makat-unan sa maong grupo kay naa man silay mga “insiders” sa nagkalainlaing pundok. Karong pila ka adlaw inyo rang masayran kon si kinsa kini sila.
* * *
Naghisgut man kita og kape nasayud ba kamo kon unsay kinamahalan nga kape sa kalibutan? Sumala pa nga kini ang civet coffee kun Kopi Luwak hinimo gikan sa coffee cherries nga gikaon ug gipaguwa nga hugaw sa civet cat kun tinggawong. Kining hugaw sa maong mananap hipuson sa mga tawo ug ilang limpiyuhan pag-ayo, sangagon ug himuong kape. Kining civet coffee mopresyo og gikan sa P700 – P1,500 matag 50 gramos kun US $150 -$300 per pound. (Ang conversion niini mao nga ang 2.205 pounds sama sa usa ka kilo). Dia may nagbaligya niining civet coffee dinhi sa Sugbo apan mahal lagi. Ang uban hinuon lud-on maghunahuna nga gikan kini sa hugaw sa tinggawong.
(msr1144@yahoo.com)