Miangal ang health officials sa Region 7 ug pipila ka local officials sa bag-ong nadiskobre karon nga Covid-19 (P.3 variant) nga gihinganlan sa Philippine Genome Center og “Central Visayas variant” gumikan kay dinhi madiskobre. Nganong “Central Visayas variant” man daw ang gihingalan niini? Nganong dili man “Philippine variant” sama sa nadiskobre sa ubang nasud sama sa United Kingdom (UK) variant, Brazil variant ug South African variant.
Dinhi kini madiskobre human adunay nagpositibo gikan sa ubang mga lugar ug sa pag-eksamin sa PGC, nasuta nga bag-o kining variant. Karon ilang gihinganlan og “Central Visayas variant.” Dili kini maki-angayon nga hinganlan og “Central Visayas variant” kay makahatag og dili maayong imahin sa taga Central Visayas. Mahadlok ang mga tawo nga mobisita dinhi. Nganong dili man daw dad-on ang ngalan sa Pilipinas kay dinhi man madiskobre?
Sila si Presidential Assistant for the Visayas Micheal Dino ug Gov. Gwen Garcia dakong supak niini. Mipasalig si Dino nga mosuwat siya kang Presidente Duterte aron manduan ang taga PGC nga ipa-usab ang ngalan niini. Aw, dili mo sa Central Visayas variant, ato na lang lagi kining tawgon nga (Bisayang Dako) Bisdak variant. Maglalis pa mo. Dugay na kong misugyot niini nga hinganlan og “Bisdak variant.”