SUPERBALITA CEBU

Super Suroy: Ang nagtagong Cambanog Falls, Dumanjug

Kon hisgutan ang lungsod sa Dumanjug nga nahimutang sa habagatang bahin sa Lalawigan sa Sugbo ang mosantop sa huna-huna sa kadaghanan mao ang ilang inasal nga manok Bisaya nga balik-balikan niadtong mga nakatilaw na.

Sa kadtong wala masuheto, ang Dumanjug nahimutang sa gibana-bana nga 73 kilometro kon manukad sa Dakbayan sa Sugbo.

Ang Dumanjug gitung-an sa lungsod sa Barili sa amihanang bahin samtang sa habagatang bahin niini ang lungsod sa Argao. Apan luyo niini, adunay natural attraction ang lungsod nga wa pa kaayo mapaila-ila sa kadaghanan.

Garbo sa Dumanjug ang nagpahipi nga hiyas ug ang katahom sa Cambanog Falls.

Ginganlan sab kini sa mga residente sa maong lugar og Kawasan o Lusno Falls, nga nahiluna sa utlanan sa Barangay Cambanog ug Barangay Masa.

Unsaon pag-adto

Alang niadtong way pribadong kasakyan kon manukad sa Cebu South Bus Terminal, sakay sa de pasaheroang bus nga mobiyahe og Ronda ug Dumanjug.

Gibana-bana nga molanat ngadto sa kapin sa duha ka oras ang biyahe depende sa sitwasyon sa trapiko.

Naog sa Dumanjug ug mamahimong mo-hire og habal-habal nga maoy mohatod kanimo sa Cambanog Falls.

Kon mosubay sa kalsada nga nagtadlas sa Sibonga–Dumanjug, manukad sa Prince Warehouse Sibonga adunay 12 km.s nga distansiya aron nga makaabot ngadto sa Barangay Masa, Dumanjug.

Lahos ngadto sa Cambanog Elementary School diin manukad ka sa pagpa-ingon sa mismong site.

Sa adunay private vehicle aron nga inyong matultolan gamit lang sa Waze ug Google Maps nga apps.

Cambanog Falls

Wala pa ma-develop o mapa-semento ang agi-anan paingon sa maong lokasyon hinungdan nga dangog ang subayon nga trail mao nga gikinahanglan nga mag-amping atol sa pagbaktas.

Apan sa imong pagt-ak mismo sa lugar dili kabayran ang kanindot sa Cambanog falls nga gihulagway sa pagkamalinawon diin maka-relax ang mosuroy nga layo sa kaguliyang sa siyudad.

Dili ka mapul-an sa natural nga atraksiyon sa maong lungsod diin ang tingog sa binundak nga tubig gikan sa ibabaw ingon man ang sapa maghatag og kahupay ilabi na niadtong gibate og stress sa trabaho, sa nagpadayon pandemiya, ug ubang suliran o kabalaka sa kinabuhi.

Hinumduman nga gikinahanglan responsable ka nga laagan, hiposa ang inyong basura ug dili mopasipala sa kinaiyahan.

Makabarato ka kay walay entrance fee ug makatagbaw pa.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph