Aron hatagan ang matag korporasyon nga makasagubang sa bag-ong enhanced community quarantine (ECQ) ug transisyon sa sistema sa online submission, ang Securities and Exchange Commission (SEC) mihatag og lugway sa deadline sa pag-sumiter sa General Information Sheet (GIS).
Kini ang gipahibawo sa SEC niadtong Marso 31 diin ang tanang stock ug non-stock nga mga korporasyon hatagan og 90 ka adlaw gikan sa petsa sa ilang annual stockholders’ meeting o annual members’ meeting nga napatik sa ilang bylaws or gipili sa ilang board of directors/trustees, aron makasumiter sa GIS.
“Pananglitan, ang usa ka korporasyon nga naglunsad sa ilang annual meeting niadtong Marso 30 adunay hangtod Hunyo 28 aron makasumite sa ilang GIS. Sa pikas bahin, ang korporasyon nga dapat mo-sumiter og report sa wala pa o mismo sa Marso 12 adunay 60 ka adlaw o hantud Mayo 11 aron motuman sa requirement,” sumala ni SEC Cebu Extension Office abogada Alma Marie E. Dalena.
Ang lugway sa deadline mo-aplay sa mga stock korporasyon diin naglunsad sa ilang annual stockholders’ meetings sa dili pa or sa panahon sa enrolment period sa bagong lunsad nga SEC Online Submission Tool (OST).
Ang enrollment period nagsugod niadtong Marso 15, 2021 ug mahuman sa Disyembre 15 niining tuiga.
Ang mga stock corporation kinahanglan mo-enrol ug mosumiter sa ilang nga annual reports pinaagi sa OST sugod karon tuiga. Samtang ang mga non-stock corporation kinahanglan na-enrol o mo-shift na sa OST sugod sa 2022. (PR)