SUPERBALITA CEBU

Migisi sa decals may ‘deperensya sa pangisip’

DECAL PILLAR LIGHTING: Gipasigahan ang mga haligi sa viaduct sa Marcelo Fernan Bridge nga gipamutangan og decals niadtong Dominggo sa alas 6 sa gabii, Abril 4, 2021. Ang pagpasiga sa mga haligi mao usab ang sinugdanan sa usa ka buwan nga selebrasyon sa Dakbayan sa Quincentennial commemorations sa Kadaugan sa Mactan. Namugna ang proyekto pinaagi ni Lapu-Lapu City Tourism Chairman Cindi King-Chan nga maoy nangulo sa kalihukan. Apan niadtong Miyerkules, ang decals sa usa sa mga haligi gilangkat ug nasayran nga babayeng may deperensya sa pangisip ang naghimo. / ALAN TANGCAWAN

Gibutyag ni Lapu-Lapu City Mayor Junard Chan nga nailhan na ang migisi sa decals sa usa sa mga haligi sa Marcelo Fernan Bridge.

Apan gipadayag sa mayor nga kini babaye nga iyang gihulagway nga adunay deperensya sa pangisip.

Hinungdan nga di na usab kini mapasakaan nila og kaso nga mao untay tuyo sa Kagamhanan aron paghatag og leksyon sa nagyama-yama sa decals nga alang unta sa ika-500 nga kasumaran sa Kadaugan sa Mactan karong Abril 27.

Gibutyag ni Chan nga nailhan ang babayeng nigisi sa decals pinaagi sa kuha sa close circuit television camera (CCTV) footage nga ilang nahuptan ug aduna usay lumolupyo sa lugar nga mikompirmar niini.

Aron kalikayan pa nga masubli ang hitabo, gimandoan na ni Chan ang Lapu-Lapu City Police Office (LCPO) sa pagbutang og personnel sa ilawom sa Marcelo Fernan Bridge.

Moabag usab ang mga tanod sa Brgy. Pusok aron pagbadlong unya sa babaye nga dili na mopaduol sa lugar.

Plano usab sa kagamhanan nga ilang iuli sa pinuy-anan ang maong babaye kon masuta asa kini nagpuyo aron masiguro nga dili na usab makabalda pa sa dapit.

Dugay ra ang maong babaye nga magpermanentihan sa dapit base usab sa pamahayag sa mga residente.

Gumikan kay aduna may nakatudlo sa babaye nga mao ang anaa sa CCTV footage, hayan siya ang tagaan ni Chan sa P10,000 nga ganti nga iyang gitanyag.

“Moadto lang siya sa office aron atong mahatag kay personal man ni nga kwarta nako,” matod ni Chan.

Ang decals nga gidayan-dayan sa mga haligi sa Marcelo Fernan Bridge alang sa umaabot kasaulogan sa dakbayan sa ika-500 ka tuig nga kasumaran sa Kadaugan sa Mactan sa Abril 27. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph