Dungan nga pag-serve sa search warrant sa Philippine Drug Enforcement Agency 7 ug sa kapulisan sa Siyudad sa Sugbo sa upat ka mga panimalay nga giingong drug den sa Barangay Mambaling, niresulta sa pagkasikop sa 19 ka drug pushers ug users.
Sa kinatibuk-an, nakasakmit usab sila og P341,836 nga balor sa illegal nga drugas.
Gisugdan ang anti-illegal drug operation alas 4:45 sa hapon, Abril 7, sa sitio Jai-alai, Barangay Mambaling.
Ilang girumbo ang drug den nga niresulta sa pagkasikop sa lima ka mga tawo, usa niini drug den maintainer nga si Michael dela Peña, alyas Baks Sanchez.
Lakip sa nasikop silang Malyn Flores, Blanch Salaritan, Virgilio Ruiz ug Ericxis Campaña.
Gisunod usab dayon ang laing drug den, diin ilang naabtan ang laing lima ka tawo nga migamit pa sa illegal nga drugas nga gipadagan ni Elvis Allera.
Ang giingong users giilang sila si John Catipay, Jolious Abanilla, Manolito Servado ug Rufo H. Servado.
Unom usab ang nadakpan sa ika tulong drug den nga gipadagan ni Gaudencio Barcelono alyas Shalaw Sanchez nga nakuhaan usab ug mga pinaketeng shabu ug mga kagamitan sa pag suyop.
Nasikop sila si Genry Artesuela, Larlie Torreon, Jessa Mae Cabesas, Jefrey Ochia ug Christoper Antipuesto.
Pagka alas 5 sa hapon sa maong adlaw, gisunod usab nila ang ikaupat nga drug den nga nahimutang sa sitio Huyong-huyong, Barangay Mambaling nga niresulta usab sa pagkasikop sa drug den maintainer nga si Edwin Doble , Junjun Pejares, Tejero Talisic ug Renato Gobalani Cristota.
Matod ni PDEA-7 Director Levi Ortiz nga nakadawat silag impormasyon gikan sa mga residente sa dapit labot sa hitak nga pagpamaligya sa illegal nga drugas, diin diha ra usab gamiton sa mga parokyano.
“Murag ginagmay lang ang ilang dula pero permente ba kusog unya ni lopok na ang ilang ngalan, so para dili na mo dako pag ayo ato nalang gyud silang pandakpon,” matod ni Ortiz.
Dugang ni Ortiz nga kasagaran sa mga durugista giingong moangkat lang og supply sa laing nga drug personalities.
Apan tungod kay daghan ang mobisita aron mogamit, modaghan usab ang ilang mabaligya. Duna nay impormasyon ang PDEA7 kinsa ang tig supply sa drugas sa maong mga drug den maintainer wa una ikabutyag sa publiko alang sa follow up operation.
“Murag angkat-angkat man nang ilaha unya ginagmay lang, pero permanente ba. Permanente nga naay customer ba, naa na tay information pero mao lagi, dili nato ma divulge kay ato pa nang kondakan for future operations,” pasabot ni Ortiz.
Dugang ni Ortiz nga ang ilang paghingusog sa kampanya batok sa illegal nga drugas alang sa ilang programa nga barangay drug clearing program sanglit di madeklarar nga drug-cleared kon aduna pay drug den ug mga manggamitay sa illegal nga drugas sa usa ka dapit.
Awhag niya sa barangay officials nga kinahanglan nga monitoron nila ang ilang mga dapit aron mapuhag ang illegal nga drugas sa matag barangay. (AYB)