Gisagop sa Department of Health (DOH) sa Huwebes, Abril 8, 2021, ang rekomendasyon sa Food and Drug Administration (FDA) sa pagsuspenso sa paggamit sa AstraZeneca vaccine alang sa mga hamtong nga 60 anyos paubos taliwa sa mga taho nga kini gilambigit sa blood clots ug ubos nga platelet counts.
Si FDA Director General Rolando Enrique Domingo niklaro nga ang pagsuspenso wa nagpasabot nga ang bakuna di epektibo batok sa coronavirus disease 2019 (Covid-19).
“It just means that we are taking precautionary measures to ensure the safety of every Filipino. We continue to underscore that the benefits of vaccination continue to outweigh the risks and we urge everyone to get vaccinated when it’s their turn,” matod niya sa usa ka pamahayag.
Iyang giawhag ang eligible sa bakuna-- healthcare workers, senior citizens ug persons with comorbidities –sa pagpabakuna.
Matod ni Domingo nga ilang gituman ang rekomendasyon sa European Medicines Agency (EMA) sa paglista sa blood clots nga talagsaong epekto sa AstraZeneca vaccine.
Iyang giangkon nga wa pay kaso sa nasod nga nabakunahan nga nag-blood clotting.
“While we have not seen such incidents in the country, the FDA has recommended to suspend the use of the vaccine for persons below 60 years old as we await results of the review being done by our local experts, as well as the official guidance of the WHO,” matod ni Domingo.
Ang Pilipinas nakadawat og kinatibuk-ang 2,525,600 nga doses sa Marso, nga gilangkuban sa 2 million sa Sinovac vaccine ug 525,600 doses sa AstraZeneca.
Kalma lang
Giawhag sa DOH Central Visayas ang publiko nga di mag-panic o maratol sa desisyon sa pag-suspenso una sa pagbakuna sa AstraZeneca vaccine sa mga nag edad og 60 anyos paubos.
Si Dr. Mary Jean Loreche, spokesperson sa DOH 7, nagkanayon nga ang naasoyng epekto wa masinati sa mga Sugboanon nga nabakunahan sa AstraZeneca vaccine.
“Actually it came as a surprise also to us nga ang FDA will issue such a statement nga Astrazeneca should not be given to those 60 and below. But right now man gud, I believe that people should be calm and not panic about this announcement because I believe that the doses that we have released here in Region 7, so far, we never have any moderate or severe adverse events,” matod ni Loreche sa Abril 8, 2021.
Ang DOH-7 nakadawat og 30,000 ka doses sa Astrazeneca vaccines.
Subay sa datos nga gihatag ni Loreche sa Abril 6, adunay 463 ka mga indibidwal ang nakasinati og adverse effects human nga nabakunahan sa CoronaVac samtang 1,106 ka mga indibidwal usab sa AstraZeneca.
Gipasabot niya nga mild cases lang ang tanan ug wa na usab makadawat og taho ang buhatan labot sa nasinating adverse effects o di maayong epekto sa mga nabakunahan na sa ikaduhang dose.
Bisan paman niini, gidasig ni Loreche ang tanan nga mopadayon sa vaccination program samtang naghuwat sa resulta sa pagtuon sa FDA.
Base sa DOH 7 data, dunay kinatibuk-ang 28,604 ka tawo ang nakadawat sa AstraZeneca vaccines.
Way epekto
Di makaapekto sa Dakbayan sa Sugbo ang pagsuspenso sa DOH paggamit sa AstraZeneca.
Si Dr. Jeffrey Ibones, pangulo sa City Health Department, nibutyag nga wa na naggamit ang Cebu City sa maong bakuna, inay Sinovac ang gi-inject ngadto sa 1,500 ka barangay health workers ug trabahante sa private clinics.
Matod ni Ibones nga adunay natusokan sa AstraZeneca, labi natong ikaduhang batch sa vaccination sa frontliners gikan sa Cebu City Medical Center.
Gipasabot niya sa Mayo pa ang ikaduhang dose sa mga natirahan sa Astrazeneca ug kon idili kini sa DOH, ila kining sundon.
Apan iyang gihulagway nga ang pagpahunong di final, sama sa ubang nasod nga nipahunong usab apan subli ra nga nibalik ang ilang pag-inject sa AstraZeneca.
Senior citizens
Ang pagbakuna sa senior citizens nga nag-edad og 60 anyos pataas gamit ang Sinovac vaccine magsugod sa Lunes, Abril 12, 2021.
Sa usa ka advisory nga giluwatan sa Miyerkules, Abril Abril 7, ang National Task Force Against Covid-19 niingon nga ang regional ug local vaccination operation centers ug implementing units kinahanglang mo-update sa ilang mga schedule nga maglakip sa senior citizens.
Ang DOH gipaabot nga moluwat og guidelines sa paggamit sa Sinovac vaccine alang sa senior citizens ning semanaha.
Ang bakuna, gitawag og CoronaVac, usa ka inactivated vaccine batok sa Covid-19 nga unang giaprobahan alang sa mga tawo nga nag-edad og 18 ngadto sa 59 anyos.
Ang FDA niaprobar niadtong Abril 7 sa paggamit sa CoronaVac alang sa senior citizens, basta nag-agi og evaluation sa panglawas sa tawo og risgo niini.
Tungod sa limitadong gidaghanon sa mga bakuna ug nagkadakong panginahanglang mapanalipdan ang senior citizens taliwa sa nagkadaghang mga kaso sa Covid-19 sa nasod, ang FDA niuyon sa rekomendasyon sa Vaccine Expert Panel sa Department of Science and Technology nga idapat ang CoronaVac sa senior citizens nga nag-edad og 60 anyos pataas. (PAC, ANV, JJL, SunStar Philippines)