MOKABAT sa P2 milyunes kapin ang balor sa mga ekipo, mga tangke sa liquefied petroleum gas (LPG) ug butane canisters ang nasakmit sa hiniusang raid sa Regional Intelligence Division (RID) 7, Department of Energy (DOE) 7 ug City Intelligence Branch (CIB) sa Lapu-Lapu City Police Office sa alas 6 sa gabii sa Abril 8, 2021.
Ang planta nga gidudahang illegal nga nang refill og LPG sa butane canisters nahimutang sa sityo Casanta, Barangay Mactan, Dakbayan sa Lapu-Lapu.
Matod ni Police Major Glenn Hife sa RID 7 nga sa ilang pag-abot, wa ang tag-iya sa planta samtang ang security guard way napakitang mga papelis nga nagtugot sa operasyon.
Busa, ilang gipangsakmit ang 50 ka 50 kilogram nga mga tangke sa LPG, 67 ka mga kahon sa wa pay sud nga butane canisters, 525 ka canisters nga duna nay sulod nga gas nga gisulod sa pito ka mga sako, laing 35 ka kahon sa canisters nga dunay sulod nga 444 ka butane canisters, walo ka mga makina ug usa ka dakong LPG tank nga dunay marking LPG Gas Manu Gas Manufacturing.
Ang raid gisaksihan nila ni Mactan Barangay Captain Evaristo Dihayco ug kaubanang mga opisyal.
Ang mga ekipo, tangke u canisters gipangdala sa raiding team.(AYB)