GIPASAKA na ang kaso sa tulo ka mga lalaki nga giingong mga sakop sa "Saga Gang" sa Digos City human sila masikop sa awtoridad niadtong Huwebes, Abril 8, 2021, didto sa Barangay Tres de Mayo, Dakbayan sa Digos.
Si Lieutenant Colonel Vici Anthony Tababa, hepe sa Digos City Police Station, nag-ila sa mga suspek nga sila si Reygan Cerna Costan, 29-anyos, minyo nga mag-uuma sa Barangay Kibalawan, Malungon Gamay, Sarangani province; Rowell Francisco Elemia, 33, ulitawo nga kawani sa Coco Davao ug residente sa Purok Sambag, Sitio Power, Barangay Tres de Mayo; ug usa ka alyas Alex, 19, taga Chapter 3 Aplaya, Digos City.
Ang ilang pagkasikop bunga sa follow-up operation sa kapulisan sa natigayong hold-up sa kanto sa dalang Aurora ug Magsaysay sakop sa Barangay Zone 3 sa Siyudad sa Digos.
Si alyas Alex milimod sa pasangil ug wala sab kini nakuhaan og ebidensiya samtang ang duha, nakuhaan og mga gidiling druga, mga armas ug mga buhing bala.
Sa kasamtangan, napadlak na sa selda sa Digos City police ang mga nahisgutan.