SUPERBALITA CEBU

Nadela: Gimingaw sa graduation

ASOY NI

Akong personal nga pasalamat sa akong mga higala sa Facebook sa ilang pagduyog nako, paglab-as sa halandumon nga adlaw diin ako nahimong bisita sa usa ka graduation ceremony pito ka tuig na ang nakalabay. Ang gradwasyon sa mga tinun-an sa Gaas National High School sa lungsod sa Balamban. Mao sab ni ang unod sa atong Asoy nga nigawas sa bulan sa Abril, tuig 2014. Gi-post nako og balik ang atong lindog ug niani og daghang reaction gikan sa atong mga higala.

Dihay mga pangutana nga gusto nakong tubagon dinhi. Usa na niini ang pangutana nganong gipili nako ang graduation sa Gaas. Niadtong nag-alagad pa ko sa ABS CBN newsroom, ang matag reporter gihatagan og kagawasan sa pag-ugmad og human interest nga mga estorya. Sanglit ting graduation halos kaming tanan sa newsroom bisan kadto wala mag-field apil nga maghunahuna unsa ug asa nga graduation ceremony ang mahimo nilang matampo para sa TV Patrol. Wa pa ni labot sa Medal of Excellence nga ipang apod apod sa mga gradwado nga dunay talagsaon nga academic performance.

Ang usa sa akong gipili mao ang Gaas National High School. Ang rason, kini tungod kay pipila ka bulan sa wala pa ang ilang graduation, saksi ko sa kapait nga ilang nahiaguman mugna niadtong subra da duha ka semana nga ulan nga nipatay sa ilang mga tanom ug kahayopan.

Nakahinumdum mo sa akong report labot niadtong mga baka sa Gaas nga gisul-oban og raincoat? Gituyo kadto isip panagang sa ulan ug katugnaw nga maoy nakaingon sa pagka matay sa daghang baka nga wala makalahutay sa dagan sa panahon. Human sa maong kalbaryo, nisunod ang resulta sa pakisusi sa Mines and Geo Science Bureau sa DENR nga may liki sa usa ka bahin sa ekwelahan sa high school maoy hinungdan nga gibalhin ang ilang klase sa gym sa barangay. Unya niadtong tungura ra ba nagpunsisok na ang daghang pamilya nga gipabakwet gunikan sa nadiskubrehan nga liki.

Ang akong kaluoy sa mga tinun-an way kabutangan. Mao na ang nag-unang hinungdan nganong gipili nako ang Gaas National High School. Sayod sila si Kapitan William Genel ug iyang konseho, nga matag adlaw nga nag-monitor ang among news team sa kaugmaran didto kay gamay nga kasikas mabutang sa peligro ang kinabuhi sa mga tinun-an. Gawas sa high school, ang mga tinun-an sa elementarya gibalhin sab sa merkado nga gitawag og Bernesan kay magtabo man og Biyernes. Gatusan ka pulis gikan sa Regional Training School ang nagpasingot og hakot sa mga lingkoranan, lamisa ug ubang gamit. Mao na nga makaingon ko nga pagka suwerte sa mga tinun-an nga wala makaagi sa kalbaryo nga naagian sa mga tinun-an sa Gaas niadtong panahona. Karon hinuon giangay na gyud ang tanan, kay tungod sa Covid19 manindot ug mabati nga eskwelahan, sa mga tinun-an wala na tungaha. Mga maestra ug maestro nalang ang nagtikaw tikaw panahon sa tinghatag sa module.

Makamingaw gyud tinuod ang graduation sa mga ingon niini nga panahon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!