Binghay: Tubag sa mga pangutana sa bakuna

Daghan na ang mga sayop nga mga huhungihong mahitungod sa Covid-19 nga bakuna maong ang uban nangahadlok o mi-atras sa pagpabakuna.

Diay mga tubag sa kumon nga mga pangutana nga akong nakuha gikan sa mismong website sa Department of Health (DOH).

Makapugong ba gayod sa pagtakod ang mga bakuna batok sa Covid-19?

Matod sa DOH, kining mga vaccine nga ipamakuna nato hulagwayong gimugna susama sa virus o bacteria nga maoy makaingon sa paghimo og antibodies sa atong lawas. Kining maong antibodies mao na say moprotihir nato panahon nga matakdan ta sa Covid-19 nga virus.

Unsa may posibling side effects ining bakuna?

Kasagaran mamuwa, makabati og katol-katol, manghubag, init ug medyo sakit ang parte sa bukton nga gi bakunahan nga molungtad og pipila ka oras human mabakunahi. Ang uban, sama sa bakuna sa flu, hilantan, makapamati og tumang kakapoy (fatigue), labad o sakit sa ulo, kasukaon, lipong ug kalibanga (diarrhea). Kon makasinati ini, tambag sa DOH nga moadto sa labing duol nila nga sangang buhatan para maabagan.

Mandatory o pinugsanay ba ang pagpabakuna ini?

Dili! Apan ang atong pangagamhanan nag-awhag natong tanan pagkuha ini aron malikayan ang pagtakod labi na kadtong edaran ug masakiton.

Kanus-a man maabot ang mga vaccine?

Hapit na mahuman ang negosasyon sa atong gobiyerno ngadto sa lainlaing manufacturers ining mga bakuna. Posibling sugod karong buwana maabot na ang supplies kay ang ubang nasod, sama sa Estados Unidos, dugay namang namakuna sa mi-aging tuig pa.

Kinsa may unahon og bakuna?

Ang mga frontline health workers nga maoy kada adlaw nga nag-atiman sa mga masakiton, mga senior citizen nga hinay og resistensiya, kadtong nagkalisod ug way kahimanan o masakiton og mga uniformed personnel ang prayoridad.

Mahimo bang mopalit ini sa botika, ospital o pribadong klinica?

Dili. Sa pagkakaron way baligya ini bisag asa. Ang ato rang gobiyerno ang dunay awtoridad sa pagpalit ug pag-apod-apod ini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph