Gitugyan na sa Department of Health (DOH) 7 sa Biyernes, Abril 9, 2021 ang phase 2 sa bag-ong gitukod nga building sa Lapu-Lapu City Hospital ngadto sa Kagamhanan sa Dakbayan.
Si Lapu-Lapu City Mayor Junard Chan ug Chief of Hospital Dr. Ronald Oporto maoy nidawat niini inubanan sa ubang mga opisyal sa kagamhanan.
Ang phase 2 gilangkoban sa ground floor ug second floor ug dunay gahin nga P27 milyones.
Ang phase 1 mao ang emergency room building nga gigamit na sa pagkakaron.
Samtang ang phase 3 mao unya ang 3rd ug 4th floor sa building, diin ang DOH maoy nipundo niini.
Mapasalamaton si Chan sa pagpalambo sa tambalanan sanglit pinaagi unya niini mas mapalambo ang serbisyong medikal nga matanyag sa tambalanan. Gihulagway sa mayor nga mao kini iyang pangandoy nga makabaton og mas dako ug functional nga tambalanan ang dakbayan.
“Mikulit og kasaysayan ug dakong kalampusan ang atong siyudad karong adlawa kay subli nang na-turnover ang atong bag-ong Lapu-Lapu City Hospital Phase 2 Building. Sa hadugay nga pagpaabot, makasinati na gayud og mas taas nga lebel sa serbisyo ang mga Oponganon gikan sa atong publikong hospital,” matod ni Chan.
Matod sa mayor nga kon kaniadto mahulog ra nga holding area ang tambalanan gumikan kay ibalhin ra dayon og laing ospital, sama sa Vicente Sotto Memorial Medical Center (VSMMC) ang mga
pasyente, karon mas makahatag na og daghang serbisyo ang tambalanan kay daghan na usab og kahimanan ang na-updgrade sa tambalanan.
Nibutyag si Chan nga nangayo siya og dugang P68 milyones nga pundo gikan kang Senador Bong Go ug Sonny Angara aron mapadali nga mahuman ang ikatulong phase sa tambalanan.
Sa ingon mas daghan pang Oponganon ang makapahimulos niini sa umaabot.
Ang tambalanan aduna na usay Malasakit Center pinaagi sa pag-abag ni Go.
“Sa building lang na kinahanglan pa og equipment. So we set aside funds para ana since next year pa ang budget. Ato we’re trying to have surplus para di gyud mahunong ang trabaho,” matod ni Chan. /