LINYA sa kuryente ang gituohang sinugdanan sa sunog nga niugdaw og 15 ka mga balay sa alas 2:40 sa kaadlawon sa Abril 9, 2021 sa A. Lopez, sityo Mahayahay, Barangay Calamba, Dakbayan sa Sugbo.
Si FO3 Emerson Arceo, imbestigador sa Cebu City Fire Office, niingon nga nagsugod sa duha ka andanang balay sa usa ka Angel Benuya ang sunog nga nikatap sa kasikbit nga mga balay.
Ang balay gihulagway ni Arceo nga ginama sa semento ug light materials.
Matod ni Arceo nga ang balay ni Benuya wa na puy-i sulod sa usa ka semana, sumala sa ilang nakuhang kasayuran gikan sa mga silingan.
Ang dapit sudlunon hinungdan nga gikinahanglan pa nilang sumpayon ang ilang mga hose aron makasulod sa dapit kay naa sa interior ang sunog.
Dako og natabang ang “hose familiarization” project sa Siyudad sa Sugbo kay nahibawo na sila kon pila ka hose ang sumpayon ug pila ka metros ang gilay-on gikan sa ilang mga firetruck.
Nipasabot si Arceo nga ang City Hall naghimo ning mao nga proyekto sa interior nga mga dapit sa siyudad aron magiyahan silang mga bombero panahon sa sunog.
Mailhan ang mga dapit sa barangay nga naa niini kay dunay mga arrow nga gipamutang sa daplin sa mga agianan.
Gikinahanglan ang reblocking sa ubang mga dapit aron di lisod kon dunay emerhensya.
Matod ni Arceo nga ang unang alarma ilang nadawat mga alas 2:43 sa kaadlawon ug nakontrolar ang kayo mga alas 3:26 ug hingpit nga napawong alas 3:32 sa kaadlawon.
Way naangol o namatay sa sunog nga nagbilin og P300,000 nga danyos.
Mokabat sa labing minos 25 ka mga pamilya ang apektado sa sunog, apan matod ni Arceo nga ang barangay padayon pang nagsusi sa tukmang gidaghanon. / REV