Planta sa illegal nga nag refill og butane gironda sa mga sakop sa Regional Intelligence Division 7, uban sa Lapu-Lapu City Police Office ug Department of Energy (DOE) 7 pasado alas 6 sa Huwebes sa gabii, Abril 8, 2021, sa sitio Casanta, Barangay Mactan, Siyudad sa Lapu-Lapu.
Nakadawat og suwat ang RID 7 gikan sa 8888 hotline sa buhatan ni President Rodrigo Duterte ug suwat gikan sa DOE 7 labot sa illegal nga pag refill sa butane gamit ang liquefied petroleum gas (LPG).
Matod ni Police Major Glenn Hefe, hepe sa Regional Special Operations Group (RSOG) 7 nga human nila madawat ang reklamo, sila nakig-alayon dayon sa buhatan DOE 7 alang sa pagronda.
Nagpatuo ang usa ka pulis nga sakop sa Police Regional Office 7 (PRO) 7 nga magpa refill sa iyang butane canister.
Sa dihang nakahatag na ang nag-refill, dali dayon nila nga gideklarar ang ronda. Dugang ni Hefe nga wa sa establisemento ang tag-iya sa planta, gwardya ra ang nagbantay.
“In plain view man ang ilang operation pag-adto namo sa lugar. Although naa siyay gate, pero nasulod gyud namo, nagpakaaron ingnon lang mi nga mopalit mi nya nakita namo didto,” matod ni Hefe.
Gisakmit nila ang mga kagamitan sa pag refill sama sa 28 ka tag 50 kilos nga orange LPG tanks, 67 ka box nga adunay mga 136 ka empty gas canisters, pito ka sako nga adunay 75 ka gas canisters nga adunay sulod, pito ka sako nga adunay 75 ka empty gas canisters, 35 ka crates nga adunay sulod nga 444 canisters nga puno sa gas.
Apil usab ang walo ka mga makina nga maoy gamit sa pag refill sa empty canisters ug usa ka giant tank nga adunay label nga Gas LPG, Gas Manu manufacturing. Ilang gibana-bana nga mobalor ang tanang nasakmit og P4 million.
Matod ni Hefe nga illegal ang operation sa planta sanglit wa silay pag ugot gikan sa DOE nga maoy ahensya nga mohatag og permit labot sa pagpamaligya sa LPG.
Hugot usab kining gidili sanglit kini ang hinungdan sa sunog ang pagbuto sa mga butane canister tungod kay di man mahimo nga LPG gas ang itubil.
“Kahibalo man gyud ang tanan nga delikado kaayo nang refilling kay mao nay usa sa mga rason sa sunog nga nahitabo mga balay kay mobuto na siya maong delikado gyud,” dugang ni Hefe.
Kalapasan sa Presidential Decree 1865 kun Guidelines for the Release and Disposal of Impounded Liquefied Petroleum Gas Cylinder ang atubangon nga kaso sa tag-iya sa maong planta.
Apan giklaro niya nga ang DOE na ang mopasaka og kaso sanglit sila ang ahensya nga nag-regulate sa negusyo sa LPG. (AYB)