Illegal swertres puhagon sa pulis

Gitahasan ni Mayor Edgardo Labella si Police Colonel Josefino Ligan, hepe sa Cebu City Police Office (CCPO) sa pagsumpo sa mga illegal nga sugal sa Dakbayan sa Sugbo.

Ang mayor nagkanayon nga di siya motugot nga maghitak ang illegal gambling hilabi na sa mga swertres nga dili ubos sa Philippine Charity Sweepstakes Office (PCSO) nga gikataho nga nagpasulabi.

Gitahasan usab ni Labella ang City Legal Office sa pag-andam sa mga kaso nga ipasaka batok ngadto sa mga nakalapas sa balaod.

“If true that there is a proliferation, I have directed the police, I have also directed Atty. Rey Gealon to be ready to file charges against those found to be engaged in illegal gambling,” padayag ni Labella.

Ang mayor nitugyan ngadto sa pulis sa pagsusi sa gitakaho nga paghitak sa illegal nga sugal, dili lang sa Barangay Carreta, kon dili sa 80 ka barangay sa dakbayan.

Gawas sa illegal swertres ug ubang illegal numbers game, gipahingusgan usab ni Labella ang batok sa tigbakay hilabi na niining panahon sa pandemya.

STATION COMMANDERS

Niini, si Ligan nimando sa tanan niyang mga station commander nga hingusgan na ang kampanya batok sa illegal nga sugal.

Matod ni Police Lieutenant Colonel Wilbert Parilla, deputy city director for operations, human mimando si Labella nga puhagon sa labing dali nga panahon ang naghitak nga illegal small town lottery, giaksyonan gilayon kini sa kapulisan sa siyudad sa Sugbo.

Una nang nakadawat og reklamo si Labella labot sa nagkadaghang STL sa siyudad nga giingong way pagtugot sa Philippine Charity Sweepstakes Office (PCSO).

“With regards to the directives of Mayor (edgardo labella), ang atoang city director has already acted with that. Our city director directed all chief of police to act with the directed of our city mayor with regards to illegal gambling specifically the numbers game,” matod ni Parilla.

Dugang ni Parilla nga ang mamahimong dakpon mao kadtong mga nitaya ug STL ushers nga maabtan sa mga pulis nga nag-isyog illegal numbers game.

Tungod niini, gilauman ni Parilla nga sunod-sunod nga pagpanakop ang himuon sa matag police station nunot sa kamandoan.

Kon adunay mga hepe nga wa magpakabana ug way madakpan, mahimong pangayoan kinig pagpasabot.

Gibutyag ni Parilla nga ilang ipatuman ang one-strike policy sa mga police station commander nga kon ang operatiba sa Police Regional Office 7 ang maka operate sa ilang huresdiksyon, mahimong mataktak kini sa pwesto.

“Ang atoang directive anang illegal gambling, the same with illegal drugs. Everytime nga dunay mga operation, kanang atoang one strike policy that is still existing,” dugang ni Parilla.

Sukad sa pagbalik sa mga bola sa STL, wa pay gitugotan nga legal nga maka operate dinhi sa dakbayan sa Sugbo, busa ilegal kon naa man.

Nabantayan sa mga awtoridad nga daghan nang ilegal nga mga outlet sa swertres nga gipamutang sa nagkadaiyang mga dapit sa dakbayan sa Sugbo, labina sa sudlunong bahin sa mga barangay apan ang uban lantaran.