Gipatangtang ni Cebu City Mayor Edgardo Labella ang binuwan nga allowance sa 13 ka mga pulis sa Sawang Calero Police Station sa Cebu City Police Office (CCPO).
Matod ni Labella nga iya unang gipahunong ang paghatag sa tag P2,500 nga allowance matag usa sa mao nga mga pulis samtang nagpadayon ang imbestigasyon.
Ang 13 pulos non-commissioned officers. Ang commissioned officers nagdawatan og tag P5,000 matag buwan.
“I have decided that for as long as their investigation is pending, hunungon usab sa atong kagamhanan ang paghatag og allowance sa mga involved nga pulis,” matod sa mayor.
Niingon si Labella nga seryuso ang mga alegasyon batok sa mga pulis busa di siya makatugot nga pasagdan lang kini.
Alang niya, di kini makiangayon sa ubang mga pulis nga nagtinarong.
“I know that generally daghan man og mga pulis nga nagtinarong sa ilang trabaho. Pero kining mga ingon ani nga mga scalawag, rotten eggs, makadaot gyud sa pagsalig sa katawhan sa pulisya.
Kinahanglan ni nato sila disiplinahon para dili modaghan.” dugang sa mayor.
Ang 13 ka mga pulis naa na sa Police Regional Office (PRO) gibalhin human sila relibuhi sa katungdanan tungod sa alegasyon sa tulo ka mga babaye nga giingong ilang mga dinakpan.
Ang 11 ka mga pulis gipasanginlan usa ka babayeng kanhi nalambigit sa illegal drugs nga nihulidap kaniya.
Ang usa sa 11 giingong ni-rape kaniya sulod sa usa ka motel.
Laing babaye nga kanhi drug pusher nipasangil nga gidala usab siya sa sekretong jail likod sa police station diin giingong siya gi-torture.
Ang lawak wa na maabti pa sa Commission on Human Rights (CHR) nga ningduaw sa miaging adlaw isip pagsugod sa ilang imbestigasyon.
Laing babaye nga reklamante nga taga Sawang Calero nihimo sa samang alegasyon batok sa mga pulis.
Ang kaso naa na karon sa Integrity Monitoring and Enhancement Group (IMEG).
Gibantayan og maayo ang mao nga mga pulis samtang sila naa sa PRO 7. (PAC, REV )