SUPERBALITA CEBU

Sabongero gidagit sa 2 ka tawo

Sabongero missing human giingong gidagit sa duha ka armadong mga tawo sayo ning semanaha.

Kini nahitabo niadtong Martes sa alas 4:45 sa hapon, Abril 6, 2021 sa Brgy. Baliang, Dakbayan sa Danao, apan wa dayon mataho sa mga kabanay.

Ang biktima giila sa kapulisan nga si Herchell “Chili Boy” Enriguez, 46, minyo, tagaBrgy. Tuburan Sur, Dakbayan sa Danao.

Si Police Staff Sgt. Allan Vertucio sa Danao City Police Station nga nahinabi sa Superbalita Cebu nagkanayon nga si Enriguez sakay sa iyang itom nga Toyota Hilux, gikan sa farm sa mga manok igtatari.

Iyang kauban sila si Romeo Gomez ug Edgar Lato samtang sila nagpadulong sa Poblacion, Dakbayan sa Danao.

Sa ilang pag-abot sa nahisgutang lugar, kalit silang gibabagan sa usa ka Toyota Fortuner nga dunay duha ka mga lalakeng sakay nga mga armado.

Ang usa nagdala og taas nga armas samtang ang usa mubo nga pusil. Ang mga kauban ni Enriguez niingon nga gipugos sa pagdala ang biktima, dala ang iyang sakyanan.

Pagka Huwebes sa buntag, Abril 8, ang sakyanan ni Enriguez napalgan sa awaaw nga dapit sa Brgy. Tag-ubi, lungsod sa Compostela.

Si Major Maria Theresa Macatangay, hepe sa Danao City Police Station nga nahinabi sa Superbalita Cebu, nagkanayon nga wa pa sila masayod sa motibo.

Gipasabot ni Macatangay nga ang pagdagit kang Enriguez wa dayon ma-report sa kapulisan.

Pagkasunod adlaw na nila na flash alarm sa kapulisan sa Probinsya sa Sugbo.

Ning pagsuwat wala pa usay demanda nga kwarta aron maisip nga kidnap for ransom ang hitabo.

Hinuon nakuhaan na nilag affidavit ang mga kuyog ug ang pamilya.

Samtang nagpaabot sab sila karon sa report sa Scene of the Crime Operation (SOCO) 7 operatives nga maoy naghiling sa sakyanan nga giabandonar.

Giklaro ni Macatagnagay, nga duna silay nadawat nga impormasyon mga kaniadto nalambigit si Enriguez sa illegal nga drugas.

Apan ila pa kining sutaon unsa ka tinuod.

Ang pamilya mipadayag nga wala silay nahibaw-an nga dunay gikaaway ang biktima.

Si Macatangay, sa follow up nga interbyu sa Superbalita Cebu niingon nga ilang itugyan sa Anti-Kidnapping Group (AKG) 7 ang kaso kay mas duna kini katakos.

Si Macatangay nipasabot nga mas makatutok ang AKG sa pag-follow up sa kaso kay maoy tahas sa buhatan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph