DI NA usab sayon ang pagsulod sa lalawigan sa Negros Oriental sugod sa Biyernes, Abril 9,2021, kay ang tanang manulod sa lalawigan gikan sa ubang mga dapit sa nasod gikinahanglan nga mopresentar og negatibong reverse transcription-polymerase chain reaction (RT-PCR) test nga balido sulod sa 72 oras sukad sa pag-release niini.
Mao kini ang unod sa Executive Order No. 10 nga giluwatan ni Provincial Governor Roel R. Degamo.
Si Degamo, sa iyang kamandoan, nipasabot nga iya kining giluwatan human masuta sa Integrated Provincial Health Office nga daghan sa mga namiyahe pasulod sa Negros Oriental gikan sa ubang mga dapit sa nasod positibo sa Sars-CoV-2, kagaw nga nagdala sa coronavirus disease 2019 (Covid-19).
Gawas niini, gitumbok sa gobernador ang taas nga mga kaso sa Covid-19 sa National Capital Region (NCR) hinungdan nga nagrekisito sila og negatibong RT-PCR.
Nipasabot si Degamo nga tumong niining RT-PCR test requirement mao ang pagpanalipod sa mga Negrense.
“There is a present felt need to require travelers of a negative RT-PCR result prior to travel as among the set of preventive measures in order to control the possible spread of the virus in the province in relation to the rising cases of Covid-19 in various parts of the country,” matod sa EO sa gobernador.
Gimandoan ni Degamo ang tanang mga local government unit sa mga siyudad ug lungsod sa Negros Oriental sa pag-monitor sa tanang mga biyahidor.
Iyang gipaalerto ang mga Barangay Health Emergency Response Teams sa pag-monitor sa mga tawo nga mopakita og influenza like illness ug itaho gilayon sa lungsod o siyudad ang kaso.
Sa Abril 8 nga datus, ang Negros Oriental dunay 126 ka aktibong mga kaso sa Covid-19 gikan sa 1,863.
Ang Dakbayan sa Dumaguete maoy dunay labing taas nga dunay 26 ka aktibong mga kaso. Gisundan kini sa lungsod sa Amlan nga dunay 24 ug Sibulan nga dunay 17. (REV)