PAMPANGA

Garcia: The Scripture Nowadays (Ding Banal a Kasulatan king Kasalungsungan)

Kapisik

“Ing batas ning ginu pantas ya, pabyayan neng pasibayu ing kaladwa;

ing pamagsaksi ning Ginu bitasa, gagawan na la ring byasa pangakaraniwan.

ding patuntun ning Ginu makatud la, pamatulan ne ing pusu;

ding utus ning Ginu dalise, pamasalan na la ring mata;

ing takut king Ginu malinis, lalambat alang angga;

Ding tuntunan ning Ginu tutu la, at makatud la mu naman;

Migit lang sukat pagnasan kesa king gintu, agyang keng lakwas malinatnat a gintu;

lakwas mayumu kesa king pulut panilan at ing tutulu karing panilan.

Subali pa kanita, kapamilatan da ing talasuyu mu mibabalan ya;

king pamintwan la ating maragul a galal.”

~Dalit|Dangka 19: Sunis 7-11

(Psalm 19:7-11)

“Mambang, pakatingiran mo ring amanu Ku,

ikiling mo ring balugbug mu karing sasabyan ku.

E mu la paburen mabating la king panakit mu; tangkapan mo king pusu mu.

Uling bye la karing makatagmu karela, at kapaldanan karing sablang laman da.

Tangkapan me ing pusu mung kisnang pamagbante, uling manibatan kaniti ing sibul ning bye.”

~Diparan|Dangka 4:Sunis 20-23

(Proverbs 4:20-23)

Nganang mekibat, “makasulat iti, E king tinape ya kabud mabiye ing tau, dapot karing balang amanung manibatan king asbuk ning Dyos.”

~Mateu| Dangka 4: Sunis 4

(Matthew 4:4)

“Pauli ning nung ninu man talapakirandam ya king amanu at e ya taladapat;

mengari yang lalaking lalawe masiri king likas nang lupa king salamin

Uling lalawe ya king sarili na at darayu ya at kabud akakalingwan na nung makananu ya lupa

Dapot ninu mang lalawe king pantas a batas, ing batas ning kalayan, at magsumikap ya

anting e talapakirandam ninung mangalingwan nung e ing talapangawa a kikimut,

mikalam ya king keyang daraptan.”

~Santyagu|Dangka 1: Sunis 23-25

(James 1:23-25)

“Ding amanu Mu meyakit la, at pengan ku la, at ding amanu Mu megi lang tula at saya

ning pusu ku, uling mayayaus ku kapamilatan ning lagyu Mu, O Ginu, Dyos ding mapamatula.”

~Eremyas|Dangka 15:Sunis 16

(Jeremiah 15:16)

***

DAKALnang pamagbayu– masanting man o masura/mayap man o ali–ing mengapalyari manibat inyang dintang ya ing internet keti king yatu at lakwas na inyang mika-social media. Manimuna neng dili ing Facebook kareti ila ning kayabe nang Instagram at ing katulid dang Twitter. Ma’pa namu mipo-post na la reng mapilan dikil keng kasalpantayanan, dapot deng keraklan e manibatan king tune sukat panibatan.

King kasalungsungan, deng tau ngeni lakwas da la pang buring pu-post deng “memes” kesa kareng sunis keng Banal a Kasulatan. Deng gagawa kasing “memes” akakwa da la keynan deng tau. Ing titiran da reti ya pin ing likas nang kaparatutan at pangamakasarili ning tau anti mo ing pamagbanal-banalan, lakwas kebysanan karing aliwa at ketasan lub.

Atin mu namang mag-post meme a pangadi ba’lang misalapai, magtagumpe king kapanintunan, baliwas o pamagkyasawa. Pekamarakal pin ila ring meme dikil keng sakit a makayawa at gagawan deng talapanulu ing Apung Ginu.

Bala da reng mailig kareng memes sisikat la o makikilala la anting byasa o malugud king Apung Ginu pauli ding posts da karing memes. Ing sakit, deting memes gawa-gawa da la mu reng ninu mang ginawa at marayu la buring sabyan kareng Banal a Kasulatan o king turu, aral at kaburyan ning Apung Ginu.

Balamu pin, e la man mamasa king Banal a Kasulatan at maralas pa ding amanung “Lord” at “God” makasulat la karela “lord” at “god” agya mang magbanal-banalan la. Makanyan man ing lagyu da o ing lagyu ning kapalsintan o asawa da maka-capitaliaze la lagyu—pati pin deng sese dang asu ampong pusa, e. Pati na lagyu ning pastul da.

Ngana pin YesuKristo king Banal a Kasulatan, Mateo 7:21: “E balang metung a sasabi kanaku, “Ginu, Ginu,” makalub king kayariyan ning banwa, dapot detang darapat karing kaburyan ning Ibpang ati king banwa.”

***

Dake Talabaldugan:

1. mipamaluktut (pangdiwa) mipamakli, mipamalipit dake ning katawan king pate o agyang biru mu. English - twisting, bending each other in a grappling fight or wrestling. Alimbawa king pamangamit: “Deng adwang lalaki mipamaluktut lang gamat angga na inyang kepilayan la’t merakap la karing dintang a pulis.”

2. mipamalungus (pangdiwa) mipanyapuk asbuk, mipate king salita; mitaltalan. English - to hit each others mouth in a fight, have a word war; to have a no-holds-barred argument. Alimbawa king pamangamit: “Disnan mi lang mipamalungus deng mikaluguran angga na king mipanumbuk na la’t mipanaspak lupa at a’p namu dintang la reng baranggay tanud.”

3. mipamaluput (pangdiwa) pate o lambis ding ubingan o aliwang kaladwan a gagapang anti ila. English - twists, coils or kinks in a fight or romance as snakes would do. Alimbawa king pamangamit: “Ila-ila mu mipamaluput la ring bitin at ing mesambut sinamul neng mabilug ning minyambut.”

4. mipamalut (pangdiwa) babagwang mipapate at ginamit da ing agi da bang sambutan ing metung at metung. English - spiders wrapping each other with web o any creature that are like spiders. Alimbawa king pamangamit: “Kabang migugong la ring babagwang kuryenti at babagwang sampaluk mipamalut la king agi da angga na inyang mesambut ya ing metung.”

5. mipamana (pangdiwa) bage binye o pigkalub anting mana ning pamana king pamanan. English - given as an inheritance by anyone to someone as an heir or heiress Alimbawa king pamangamit: “Ing sablang pibandyan na pati na inutang ning meangu-bye mipamana king likwan na ngan king kalulung asawa na.”

***

SADYANG GAWI DA RENG KAPAMPANGAN

Anggang manga pulumbanwang 1970, deng anak a talapagaral midirinan lang “katesismu” o aklat a malati nung nu makapalaman la karin ding sablang pangadi a tuturu ning Pisamban Katoliku at ding sangkap ning kasalpantayanan agpang kaniti. Deti pabayad da la manga 10 anggang 20 sentimus deng tuturung pangadi a awsan dang CCD o Catholic Christian Doctrines Teachers.

Deting CCD teachers ala lang bayad keng pamanuru dang pangadi at mengari mung panata o kasuywan iti para king Apung Ginu. Deng kayanakan kanita asno kabyasang mangadi at manungge pangadi agyang ilang dili kambe ning pamanungge king Nwan a Rusadyu at balang metung karela ating babakalang rusadyu keng datukanan dang gamit pipagaralan.

King kasalungsungan metung nang gawi iting mekalingwan.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph