NAKATALA og 26 ka mga bag-ong kaso sa coronavirus disease (Covid-19) ang Cagayan de Oro, pulos mga local transmissions, sumala sa report sa City Health Office Sabado, Abril 10.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 4,298.
Sumala ni City Health Officer Dr. Lorraine Nery, sa 26 ka mga bag-ong lokal nga kaso, tulo ang mga persons deprived of liberty (PDLs), tulo ang mga lokal authorized persons outside residence (Apors), 10 ang mga local index nga mga kaso, ug 10 ang mga local case with link.
Sa 4,298 nga kinatibuk-ang kaso sa Covid-19 sa syudad, 431 ang mga returning overseas Filipino workers/locally stranded individuals (ROFs/LSIs) ug 3,867 ang mga local transmissions.
Ang Cagayan de Oro adunay 222 ka mga active cases, 66 niini na-admit sa Northern Mindanao Medical Center ug uban pang mga ospital sa syudad, 151 ang mga outpatients, ug lima ang mga ROFs/LSIs.
Nakatala usab og upat ka mga Covid-positive nga mga kaso nga karon naka-recover. Anaa na karon sa 3,875 ang ihap sa mga nakarekober nga mga kaso sa dakbayan.
Sa maong numero, 303 ang mga LSIs, 121 ang mga ROFs, ug 3,451 ang mga lokal nga kaso (community: 2,925; Apors: 526).
Ang recovery rate sa Cagayan de Oro anaa na sa 90.15 percent.
Ang ihap sa mga namatay sa Covid-19 sa syudad naa sa 201.