Gidasunan sa Court of Appeals ang desisyon sa Securities and Exchange Commission (SEC) sa pagbakwi sa lisensya o certificate of incorporation sa KapaCommunity Ministry International tungod sa ilang mga pagpangilad sa katawhan.
Subay sa 18 ka pahina nga desisyon nga giluwatan sa Marso 11, 2021, ang CA Special 16th Division niingon nga ang SEC adunay eklusibong hurisdiksyon sa petisyon alang sa pagbakwi sa incorporation sa Kapa.
Sa susamang higayon, giuyonan sa CA ang petisyon sa pagtangtang og legal nga personalidad sa Kapa subay sa saktong proseso ug ang desisyon sa SEC base sa solidong kapasikaran ug igong ebidensiya.
Ang Commission En Banc nihimo sa order of revocationniadtong Abril 3, 2019 human makita nga ang Kapa nitanyag ug namaligya og securities ginamit ang usa ka investment contract ug pagtakoban nga kini donasyon, ngadto sa publiko nga walay pagtugot sa SEC.
Subay sa Section 6 (i)(2) sa Presidential Decree No. 902-A, ang SEC pweding mobakwi sa certificate of incorporation sa usa ka entidad pinasikad sa “serious misrepresentation as to what the corporation can do or is doing to the great prejudice of or damage to the general public.”
“The SEC has established by substantial evidence that Kapa was engaged in an unlawful investment activity,” sumala sa CA, diin nagpamatudan sa resulta sa imbestigasyon sa SEC nga ang pagpangsolicit og donasyon sa Kapa nilangkob isip pagtanyag o pagbaligya og securities pinaagi sa investment contracts.
Ang kakuwang sa permit aron motanyag og securities sa publiko usa ka kalapasan sa Republic Act No. 8799 kun Securities Regulation Code (SRC).
“Pastor Apolinario cannot deny that Kapa is engaged in any solicitation or investment scheme,” gipasabot sa CA.
“In one of the investigations of the SEC, several platforms were used by Kapa in social media with Pastor Apolinario excessively talking about Kapa’s investment scheme and how to earn profits from it,”dugang nga punto sa CA.
Gidugang usab sa appellate court nga ang pagbakwi sa certificate of incorporation sakto ug matarong.
Gisalikway usab sa CA ang giingon sa KAPA nga gisupak sa SEC ang temporary restraining order (TRO) gikan sa Regional Trial Court sa General Santos City, Branch 35 diin mipagawas kini og order of revocation samtang ang TRO gipatuman.
Ang maong TRO nga giissue niadtong Marso 19, 2019, nagmando sa SEC sa di pagimplementar sa cease and desist order(CDO) batok sa Kapa nga giisyu niadtong Pebrero 14, 2019.
Apan sumala sa CA, ang pagpa gawas og TRO kuwang og legal nga basehanan tungod kay kini nanghilabot sa pagpatuman sa SEC sa iyang gahum ug katungdanan.
Ang Seksyon 179 sa Republic Act No. 11232 o Revised Corporation Code sa Pilipinas nagingon nga way korte ubos sa CA ang adunay hurisdiksyon nga moissue og restraining order nga direkta o indirekta nga mang hilabot sa pagpatuman sa gahum, katungdanan ug responsibilidad sa SEC nga nahasulod “exclusively” sa iyang hurisdiksyon. / REV gikan sa PR